Mizoram tleirawlte an chak

Hero Junior (U-17) Women's National Football Championship-ah Mizoram chuan nimin khan Karnataka 2-0 in an hneh. Mizoram tan hian Champhai tleirawl Lalrintluangi leh Seling tleirawl Gospel Vanlalsawmi ten second half-ah goal an khung.

Mizoram hian June 21 khan match hmasa berah Chattisgarh an hmachhawn a, 1-1 in an inhnehtawk. Group khat aṭangin team khat chauh tlang tur a ni a, Mizoram hian June 25, Inrinni tlai dar 1:00 hian Uttar Pradesh an hmachhawn leh ang. Inelna hi Guwahati-a neih a ni.

Mizoram coach Samuel Lalrinngheta chuan, "2-0 in chak mah ila kan vanneiin ka hria. Team ṭha tak tia sawi tur chu ni lo mah ila team chhe tak erawh kan ni lo. Mizoram tan theihtawp kan chhuah zel dawn a, ṭawngṭaina lamah Mizo mipuiten min lo hre reng dawn nia," tiin Vanglaini a hrilh.