PSG inkhel a hmuna entu an awm

Paris Saint-Germain chuan Pathianni zan khan second division club Le Havre chu friendly match an khelhpui a, 9-0 ngawtin an chak. Goal lut zat ai chuan a hmuna inkhel entu fans awm chuan sawi zui a hlawh zawk.

Covid-19 vangin March thla aṭang khan infiamna khawvel chu a kal dan pangngaiin a kal thei lo. French Ligue 1 phei chu April thla khan season an ti tawp fel der tawh a, lungawi lo tawk awm mah se court chuan thubuai pawh a chingfel leh tawh.

France sorkar chuan September thla hma chuan an ram chhungah infiamna lian tham neih a rem loh tur thu a puang a, beisei aia hmain kawl a eng dawn niin a lang - PSG inkhel pawh hi a hmunah mi 5,000 velin an en.

A hmuna entu zinga mi, sports minister hlui Roxana Maracineanu chuan, "Football tan hnehna a ni a, infiamna zawng zawng tan pawh chanchin lawmawm a ni. Hun rei lote hnuah chuan kan ramah hian infiamna pawh a kalphung pangngaiin a kal leh thei ang ka ring," a ti.

Ligue 1 khar fel tawh mah se French Cup leh League Cup final khelh hmabak an la nei a, inkhel pahnih hi a hmuna entu an awm theih a rinawm. Season thar an ṭan hun tur pawh beisei aia hmain a nih theih a beiseiawm ta hle.

France-ah hian football bakah infiamna dang tennis pawhin a hmuna entu awmtir an tum. September thla tawp hian French Open khelh a ni dawn a, stadium khata luh la rem lo mah se 60% vel a hmuna entu an awm an phal dawn a ni.