Mizoram Super League khelh laiah Tuikual South chuan Chawnpui 64-60 in an hneh a, match ruk an khelh tawh chinah vawi thum chakin pathumna dinhmun an luah; a sang pali zinga tel tlang turin an dinhmun an siamṭha zel.
Nilaini zan R. Dengṭhuama Indoor Stadium, Mualpuia inkhelah Tuikual tan Darrell Bowie-a'n point 19 a nei a, point 13 neitu Dennis Lalmuanpuia a langsar bawk -anni pahnih lo chu TKS player zingah point 10 nei tling an awm lo.
Phengphehlep an khel ṭha tawk lo, chutihrualin basket nei hnem lo mah se anmahni basket venhim kawngah an ṭang thei thung. Mizo hlanga khel Chawnpui player zingah point 15 nei tling thei an awm lo a, tun season MSL bikah chuan match khata point a luh tlem ber a la ni hial.
Tuikual hian vawiin tlai dar 5:00-ah vawi hnih champion tawh Khatla TBL an hmachhawn zui leh nghal dawn. Chawnpui pawhin zan dar 8:30-ah Chanmari Vikings an tum leh nghal a ngai dawn, tun hnaiah a ni zawnin match an khelh a ngai hlawm a ni.
Nilaini inkhel dangah Zarkawt BCA chuan Mission Veng Hotshots lakah 91-83 in hnehna an chang bawk. A zawna vawi thum champion tawh BCA hian tualchhung player an neih ṭhat an chhawr ṭangkai thei hle.
Matthew Remtluanga Sailo (25 points), Zonunsanga (15) leh Lalrina Renthlei (13) te chu an chakna hnar a ni. Anni pathum hi kum nga chuang khelho tawh an ni a, an inman takzet - team dang tan BCA hneh tur chuan 'Mizo Trio' hi ven dan tur ngaihtuah chhuah a ngai ang.