Inter Village Fixtures siam rem

LBS Suzuki All Mizoram Inter Village Football Tournament 2022 Fixtures chu ground ṭhenkhat allotment hmuh theih loh avangin fixtures hi siamrem a ni.

Inelna buatsaihtu Mizoram Football Association chuan June 22, Nilaini zan khan thuchhuah an siam a, vawiin aṭanga inelna ṭan a nih tawh dawn avangin inelna hmachhawn tur tan khelh hun tur finfiah a ṭha hle.

Fixtures chhuak tharah hian last 16 khelhna hmun leh hun tur thleng tarlan a ni a, MFA lamin an ennawn leh lo a nih chuan group D-a awm team-ten round of 32 thleng Aizawl khaw pawn Lengpuiah an khel char char dawn.

Group C-in Lengpui ang bawka Aizawl aṭanga hla MFA Ground, Sairang an chang a, anni erawh an vannei hret - round of 32-ah Lammualah an khel thei ang. Group B-a awm team-te an vannei ta ber a, RG Stadium, MZU Ground leh Lammualah te an khel dawn. Group A-in round of 32-ah MFA Ground, Sairangah an inkhel ang a, hemi zawng hi chuan Lammualah an khel ang.

Inelnaah hian team 204 an tel a, first round-ah match 76 awmin team 52 an bye. Second round-ah hian team 128 an awm ang a, third round-ah team 64, fourth round-ah team 32 an awm ang. A tawi zawngin first round aṭanga khel ṭan team tan champion turin match riat chak a ngai dawn.