Tennis a khelh hnuhnung ber aṭangin kum khat deuh thaw a liam tawh, a thiam erawh a la theihnghilh bik lo. Serena Williams chu tennis court-ah a lo kir leh ta a, doubles huangah inlanin Eastbourne International-ah quarterfinal an lut.
Eastbourne International-ah hian doubles huangah a inlan, a ṭanpui Ons Jabeur nen Nilaini zan khan Shuko Aoyama leh Chan Hao-ching te chu 6-2, 6-4 in an hneh, an match hmasa zawkah Sara Sorribes Tormo leh Marie Bouzkova te ṭang dun chu 2-6, 6-3, 13-11 in an hneh tawh bawk.
Season hmasa Wimbledon-ah khan Serena hi a match hmasa berah a chak lo, a ke hliam vangin a buai chhunzawm bawk. A hnu lamah chuan tun tournament hi a inkhelh lehna hmasa ber a ni a, a tan chanchin lawmawm a ni ngei ang.
American star hian major title 23 a lak zinga pasarih chu Wimbledon title a ni a, grass court inelna lianah hian kuminah tel ngei a tum. Grand Slam champion hnem ber Margaret Court-i (24 titles) record nihrual turin vawi khat champion a la mamawh.
Wimbledon hi tunkar chhungin qualifying khelh mek a ni - Zirtawpniah inkhel tur an pawt ang. July 27, Thawhṭanni aṭangin first round khelh ṭan a ni dawn. Serena hi wildcard pek a nih avangin main draw aṭangin inelna bul a ṭan thei dawn a ni.