Tevez-a'n Rosario Central enkawl dawn

Argentine club Rosario Central chuan coach atan Manchester City, Manchester United leh Juventus star hlui Carlos Tevez an lakluh thu an puang. Kum 38 mi Tevez hian June 4 khan inkhelh a chawlhsan a, team enkawl hna a chhunzawm nghal dawn.

Rosario Central hi Argentina-a league sang ber Argentine Primera Division-a awm an ni a, tun season bul an ṭan ṭha lo. Match li an khelh tawhah vawi khat chauh an la chak a, vawi hnih an chak loh avangin point li hmuin table-ah 23-naah an awm mek.

Tevez chuan, "Player ka nih lai aṭangin ka chungah beiseina sang tak an nghat ṭhin a, amaherawhchu manager erawh ka tan hna thar a ni. A nihna takah chuan beiseina sang tak ka chunga an nghat hi mak ka ti a, chutihrualin ka hlauthawng hran lo," tiin a sawi.

Boca Juniors forward hlui Tevez chuan sawi chhunzawmin, "Juventus-a ka awm lai khan Antonio Conte-a'n min enkawl a, amah aṭang hian thil ṭhahnem tak ka zir. Conte aṭanga ka zir ang chanve tal lantir ka tum dawn a ni," tiin a sawi.

Rosario Central goalkeeper Gaspar Servio chuan amah leh player dangten lawm taka Tevez an pawm thu a sawi ve bawk.