Hamilton-a'n hnehna a chang

Pathianni zan khan Formual 1 Styrian Grand Prix tlan a ni a, champion lai Lewis Hamilton chuan tun season bika a vawi khat nan hnehna a chang - car intlansiakna sang bera hnehna a chan zat chu vawi 85 a tling ta chiah.

Kar hmasa khan Red Bull Ring-ah season khuh hawn nan Austrian Grand Prix tlan a ni a, Mercedes driver Valtteri Bottas a chak ber. Tlankawng ngaiah bawk inelna neih leh niin Bottas hi pahnihna a ni a, a teammate Hamilton a chungnung thung.

Britain tlangval Hamilton chuan, "Team thawhrah a ni, engkim mai kha ruahmanna fel fai leh ṭha tak hnuaiah a awm vek," a ti. Lewis hi qualifying lam a chet ṭhat avangin a hmasa ber aṭangin inelna a hmachhawn a, harsa lutuk loin hnehna a chang thei.

Mercedes an ropui laiin Ferrari erawh an mualpho - an driver pahnih Sebastian Vettel leh Charles Leclerc te an intihpalh hnuah intlansiak an tlan zo ve thei lo; season hmasa ang bawkin team chhung buaina a la fel lo tih a chiang.

World champion vawi li ni tawh Vettel-a'n 10-na aṭangin inelna bul a ṭan a, a teammate Leclerc chu 14-naah a awm thung. Lap hmasa ber an tlan laiin an inbakkaih, tawnhriat nei tlem zawk Leclerc-a'n a hma lama awmte tlan pelh a tumna lamah chhiatna a thlen a ni.

Kum 22 mi Leclerc chuan, "Ka tihsual avangin a pawi ka ti takzet, tun ṭum thil thlengah khan Sebastian khan tihsual a nei ve lo. Pawi ti viau mah ila siam ṭhat theih a ni tawh si lo, lap hmasa ber aṭang khan car dangte tlan pelh kha ka chak em a ni. Ka tihsual aṭangin ka inzir ang," a ti. Tun season atana F1 inelna hi tih chian theih chin 10 chauh a la awm. July 19, Pathianni hian a pathumna atan Hungaroring tlankawngah Hungarian Grand Prix an tlan ang.