Chelsea-in Mourinho thluak chelh lo
Old Trafford-ah Chelsea an lenglut a, Jose Mourinho ruahmanna an chelh phak loh avangin Antonio Conte hote leh Tottenham Hotspurs inkarah point li chauh a awm - Premier League champion tur a la chiang lo.
Pathianni zanah United-in Marcus Rashford leh Ander Herrera te goal hmangin Chelsea 2-0 in an hneh a, Blues hian goal zawnah vawi khat pawh an pet lo. Mourinho hote hian an mualah point thum leh inrintawkna hlawh chhuakin table-ah panganaah awmin point 60 an hmu a, an hmelma Manchester City chu match khata khel tlem chungin point liin an pha lo - season thara Champions League khel tur pawh a hriat chuang loh.
'The Special Plan'
Antonio Conte hoten Stamford Bridge-ah Mourinho enkawl United hi league-ah 4-0 in a sawp tawh. FA Cup-ah Portuguese manager hian mualpho nawn tum lo mah se Eden Hazard veng tura dah Spanish midfielder Ander Herrera chu minute 35-naa hnawhchhuah a nih avangin Chelsea-in kawng engkima thunun chungin hnehna an chang nawn.
Old Trafford-ah Mourinho-a'n Herrera hi hna ngai chelhtirin Blues chakna hnar Belgian winger Hazard a dahṭha a, Blues thiampuipa ber a chet theih loh avangin player dang an che thei bik lo.
Portuguese manager hian tlarhmaah Zlatan Ibrahimovic aiah Marcus Rashford thlangin English rawlthar dang Jesse Lingard nen an thawhrimna hmangin Blues tlarhnung an tibuai a, an tlan chakna an hmangthiam bawk. United hian an goal venghim turin tlarhma aṭangin an ṭan a, hei hi Mourinho tih zen zen loh a nih avangin Antonio Conte hote an talbuai phah hle.
Khawvel player manto ber Paul Pogba leh Marouane Fellaini ten midfield inbeihnaah hnehna an chang a, Chelsea midfielder N'Golo Kante khelh ṭhat loh ṭum a nih ve chiah hian awmze neiin Mourinho-a'n game plan a siam tih a lang.
Blues-in goal zawnah ball an pet lo a, hei hian striker Diego Costa a che thei lo tih a lang bawk. Tun season league-a goal 17 khung tawh striker Costa hi United defender Eric Bailly leh Marcos Rojo ten an hlat ngai lo.
Chak phu United
Chelsea manager Antonio Conte chuan, "United-in chak an phu a, an khelh danah chak an duh zawk a, an châk zawk a, chak duhna thinlung an pu zawk," tiin an khelh ṭhat tawk loh thu a sawi.
Referee thutluknaah erawh Italian manager a lawm lo. Conte chuan, "United laka kan goal chhuah dan chiah hian Bournemouth lakah goal kan chhuah tawh a, Palace lakah chiang taka handball-ah penalty pek kan ni lo. Referee thutlukna kan duh ang zawngin a kal lo a, kan vanduai a ni," a ti. United goal hmahruai Rashford-a'n a khung hmain ball petu Herrera chu chiang takin a handball a, referee-in a ham lo!
A zei ngai nen Jose
United manager Jose Mourinho chuan, "Chelsea kan hneh avangin ka lawm belh lo a, kan hneh hi league hmahruaitu an ni. League hmahruaitu emaw Chelsea emaw an nih vang ni loin chiang taka hnehna kan chan avang leh point thum kan hmuh avangin ka lawm," tiin a rilru tak a sawi chhuak.
Portuguese manager chuan, "Europa League kan khelh dawn vangin kan player zingah kan awltir ni loin Chelsea hmachhawn tura kan ṭhat theih ang berin player kan thlang pawh a ni thei," tiin Ibrahimovic chu duh reng vanga bench-a ṭhuttir a nih theih thu a sawi a, United boss hian Rashford a fak bawk.
Chelsea kawng a bumboh
Chelsea-in season tawp lamah squad an neih chhah tawk lo tih a lang a, Crystal Palace laka an tlawm hnuah United an hneh lo. Blues chak loh chhan hi Mourinho game plan fuh vang ni pakhat bawk mah se goalkeeper Thibaut Courtois chu training-naah a inhliam a, left back Marcos Alonso chu damlohna vangin a inlan thei lo bawk.
Blues hian starting eleven-a an chhawr rim Courtois leh Alonso tel loin ngai an awh lo a, an hmabakah Everton chiah khelh harsa an awm nachungin chesual thei an ni tih a lang.
Antoino Conte hote hian Southampton (h), Everton (a), Middlesbrough (h), West Brom (a), Watford (h) leh Sunderland (h) te an la hmachhawn dawn. Tun hnaia che ṭha tak Tottenham Hotspurs-in Crystal Palace (a), Arsenal (h), West Ham (a), Man Utd (h), Leicester (a) leh Hull City (a) te an la khelh pui dawn avangin Blues hi Old Trafford-ah tlawm mah se champion tura rinkai an la ni.