East Bengal beiseina titawptu Jerry

Trevor Morgan-a enkawl East Bengal-in a vawi khat nan I League nomawi beisei mah se, Pathianni zan khan an beiseina chu tihtawpin a awm a, DSK Shivajians lakah 1-0 in an tlawm - he inkhela goal awm chhun khungtu hi Mizo rawlthar Jerry Mawihmingthanga a ni.

Kolkata Derby-a tlawm hlim East Bengal chhungkua an buai a, coach Trevor Morgan berin media hmaah club chhungkaw boruak chhiat thu a sawi bakah fan-te nen intithiam loa puh an goalkeeper rinrawl Rehenesh TP chu Kerala lamah thawn haw a ni bawk.

Khelmualah East Bengal buaina hmuh turin a awm a, DSK tan Seityasen Singh leh Jerry ten chance an nei nghal. East Bengal tan Chris Payne chuan chance vawi nga zet nei mah se goal-ah a chantir thei bik lo. Minute 29-na a ni a, Jerry-a'n a chance ṭha neih a hlah tawh lo.

Real Madrid youth system chhuak Juan Quero chuan Chanmari rawlthar tan hian ṭha zetin ball a thlawh lut a, vengtu nei lo Jerry-a'n a hming chher nana hmangin mawi zetin a tauh lut - East Bengal an hawihai.

East Bengal tan Rowllin Borges leh Bikash Jairu ten si phurh sutna remchang nei ve leh mah se tawnhriat ngah keeper Subrata Paul an paltlang thei lo a, second half ṭantirha Robin Singh pet goal chu a pet hmaa Subrata laka a foul avangin pawm a ni lo bawk.

DSK vanneih a kaltluang a, Subrata-a'n a chhan theih loh ṭumah pawh Jackichand Singh pet goal ngei tur nia lang chu defender Sasa Kolunija-a'n goal line aṭangin a pet chhuak hman! East Bengal tan minute 75-naah Lalrindika Ralte tlan luhtir ni mah se Lunglei tlangval hian danglamna a thlen thei bik lo a, Kolkata club an tlawm.

East Bengal hian an hmabak match hnihah hnehna chang pawh nise an chunga awm Aizawl FC leh Mohun Bagan chu point ruk zetin an phak lo tawh a, team pahnih lakah an head-to-head record a chhiat bawk avangin pathumna aia sang an ni thei tawh lo.

Team Dinhmun
Team Pld W D L GF GA GD Pts
Mohun Bagan 16 9 6 1 25 10 15 33
Aizawl 16 10 3 3 22 13 9 33
East Bengal 16 8 3 5 26 14 12 27
Bengaluru 16 6 6 4 20 15 5 24
Shillong Lajong 16 7 3 6 22 21 1 24
Churchill Brothers 16 4 5 7 18 22 -4 17
Shivajians 16 4 5 7 18 19 -1 17
Chennai City 16 4 5 7 13 21 -8 17
Minerva Punjab 16 2 6 8 12 26 -14 12
Mumbai 16 2 6 8 8 23 -15 12