Leicester City an zam lo

Zanin dar 12:15-ah Leicester City-in Champions League quar­terfinal second leg-ah Atletico Madrid an mikhual dawn a, Premier League champion hi khualmualah 1-0 in tlawm mah se an zam lo - Diego Simeone-a naute hneh ngei an tum.

Vicente Calderon-a inkhelah Atletico-in Antoine Griezmann-a penalty sawisel hlawh tak chhawr ṭangkaiin hnehna an chang hram a, season thum chhung vawi hnih Champions League final lut thei Atletico an hlau lo hi thil mak a ni hran lo.

Foxes manager Craig Shake­speare chuan, "Atletico nen kan inkhelh hma khan min zawt se an muala 1-0 a tlawm pawi kan ti vakin ka ring lo. Khualmualah goal khung tumin kan kal ngei a, mahse Atletico kha team ṭha tak an ni tih kan hmu a ni," a ti.

Shakerspeare chuan an khel­mualah an khelh tawh dawn avanga an zam loh thu erawh sawi nghalin, "King Power Stadium-ah hian record ṭha tak kan neih avangin kan zam lo. Beisei kan la nei a ni," a ti a, Spanish club ṭha hneh theih a inbeisei.

Leicester hian an match hnu­hnung berah Crystal Palace chu 2-2 in an inhnehtawkpui a, Shakespeare chuan, "Atletico laka harhna lantir turin he result hi kan mamawh a ni mai thei asin," tiin thiam takin a sawi a, zaninah chak a tum tih a chiang.

Atletico Madrid-in an match hnuhnung berah Osasuna chu 3-0 in hneh mah se penalty vawi hnih ngawt an pet goal lo a, thu hriat nuam erawh Griezmann tel lo pawha goal thum ngawt an khung thei kha a ni. Foxes nena an inkhel tur thlir chunga chawlh hahdamtir French forward hi zaninah chuan a inlan leh tawh ang a, Leicester tlarhnung tan hna a tam leh dawn.