NBA Playoffs Warriors tan Durant a langsar

Golden State Warriors chuan Pathianni zan khan 2017 NBA Playoffs-a an match hmasa ber khelin Portland Trail Blazers 121-109 in an hneh. Inkhel dangah Chicago Bulls leh Houston Rockets ten hnehna an chang ve bawk. Ningani zing dar 8:00-ah game 2 an khel leh ang.

Oracle Arena, Oakland-a inkhelah Golden State tan hian Durant chuan double double a nei; American star hian Warriors tana playoff match a khelh hmasak ber zanah hian point 32 a score bakah rebound vawi 10 a la thei.

NBA Most Valuable Player ni lai Stephen Curry-a'n point 29 score-in Durant a thlawp ṭha a, sawi hmaih theih loh chu Draymond Green a ni. Green hian point 19 a neih bakah rebound vawi 12 lain assists pakua a nei - block panga leh steals vawi thum a nei tel cheu bawk.

Inkhel dangah James Harden chuan point 37 score in Houston Rockets chu Oklahoma City Thunder lakah 118-87 in hnehna a chanpui. Thunder tan tun season MVP tura rinkai Russell Westbrook-a'n nidang a phak lo chungin point 22 a score bakah rebounds vawi 11 a la tho a, turnovers vawi kua ngawt a nei thung.