Mohun Bagan: Eng ti'ang taka ṭha nge an nih?
April 22-ah Aizawl FC-in Mohun Bagan an mikhual dawn a, RG Stadium, Mualpuia inkhel tur hi 'I League final' tih hiala chhal ngam a ni - Mizo club hian goal hnih china hnehna an chang thei a nih chuan an champion ang. Mizoram mai ni lo, North East football-a la thleng ngai lo thil an thlentir ang.
Mahse, Mizo club tan beisei ang ngawtin thil a awlsam dawn lo tih chu lang chiang sa a ni - an hmaa ding tur club hi Bagan an ni tlat. Kolkata club hi kum 1989 khan a hunlaia India prime minister Rajiv Gandhi chuan 'National Club of India' nihna a lo pe tawh a, he dinhmun hi chhuang taka sawi chungin India ram football awptu nih reng hi an duh chu a ni.
Belchiang ang
Kum 127 kal ta, August 15, 1889-ah khan Bagan hi din an ni a, kum 1984-a din Aizawl FC nen an in upat hleih hle. Bagan hian uanpui tham record duhawm tak tak an nei nual a, Federation Cup-ah vawi 14 champion tawhin nomawi chawi ngun ber an ni a, inelna hrang hrangah nomawi 248 nei tawhin Indian club zinga champion ngun ber an ni.
Kolkata club hi I League ṭan a nih hmaa India ram club inelna sang ber National Football League-ah vawi thum an champion hman a, 2014-15 season khan I League nomawi an chawi bawk. Durand Cup (16), IFA Shield (22) leh Calcutta Football League (29) ah te pawh insawitheihna tham khawpa tam nomawi an chawi tawh a, Indian club zinga AFC Champions League-a qualifier round hnihna khel thei hmasa ber an ni bawk.
Tu nge Norde?
Mohun Bagan sawi a nih apianga mitthlaa lo lang tel nghal ṭhin chu Haitian winger tlan chak Sony Norde a ni. Argentine club ṭha Boca Juniors B team aṭanga bul ṭantu winger hian season khatah nuai 250 a hlawh nia ngaih a ni a, a hlawh zat aṭang ringawta chhut pawhin player chhia a ni thei lo.
Haiti tana vawi 23 inlan tawh Norde hian tun season I League-ah match 13 khel tawhin goal thum a khung a, AFC Cup-ah match li khelin goal thum tho a khung tawh bawk. Kum 27-a upa winger hi a goal khung aṭanga teh chi erawh a ni lo, a tharum ngahna leh thiamna hmanga a ṭhiante tana hmun awl siamsak tura an khingpui tlarhnung a chhaih mangang lai hi football ngainatu tawh phawt chuan hmuhnawm an ti ang!
Bagan tlarhma
Kolkata club ropuina sawi a nih apiangin an tlarhma sawi hmasak an ni ṭhin. Sony Norde hming lam nawn a ngai tawh lo a, Haitian winger piah lamah hian I League-a Indian player hlawh hnem ber Jeje Lalpekhlua, Scottish striker Darryl Duffy leh captain Katsumi Yusa te an la awm a, I League club tlarhnung tan mangchhia an ni.
Season hmasa Indian football-a mimal chawimawina dawn theih ang zawng zawng dawng kimtu Jeje-a'n goal nga a khung tawh a, Swansea striker hlui Duffy-a'n goal sarih a khung tawh bawk. Striker pahnih hah changa chhawr turin goal li khung tawh Balwant Singh leh rawlthar beiseiawm Azharuddin Mallick an la awm cheu.
Captain Fantastic
I League club sum seng hnem ve veah East Bengal-in Mohun Bagan an tluk lohna nia an sawi chu an ram pawn player-ten club an inhmangaih hleih tih hi a ni a, Bengal player ten mimal tana an khelh laiin Bagan erawh team tan an khel thung - team inlungrualna kawngah captain Katsumi Yusa lam hmaih theih a ni lo.
Japanese midfielder hian kum 2011-a Paraguay second division club San Lorenzo aṭanga ONGC a rawn zawm tirhin tu ngaihven hlawh lo mah se 2013-a Mohun Bagan a pan hnuah erawh India rama foreign player langsar pawlah a invawrh chho a, season hmasa ISL-a NorthEast United tana a inlan ṭum pawhin J1 League club Sanfrecce Hiroshima-a bul ṭantu midfielder hi player pawimawh pawl ni phak a ni.
Great Wall of Bagan
Mohun Bagan-in vawi 16 league match an khelh tawhah goal 25 zet an khung a, an lama lut zat erawh goal 10 chiah a ni thung - Kolkata club aia goal chhuah tlem an awm lo. Bagan-in I League nomawi chawi an tumna kawngah tlarhnungah Anas Edathodika, Eduardo Ferreira, Pritam Kotal leh goalkeeper Debjit Majumder ten an thawh hlawk takzet.
Kum 30-a upa Anas hi Pune City-in 2015 ISL ṭan dawna nuai 42 zeta an lei ngam kha a ni a, a chhe thei lo. Right back Pritam Kotal hi kum 23 leka upa nichungin India tana vawi 17 inlan thei a ni a, Eduardo Ferreira hi youth player a nih laia Brazilian club ṭha Fluminense, Flamengo leh Corinthians-a inzir kual a ni a, a thiam loh aiin a thiam a tam zawk ang!
Bagan tan Sanjoy
Kum 2010-ah khan Sanjoy Sen-a'n a vawi khat nan I League club a enkawl ve chauh a, Chirag United Sports Club-a zawm. Team 14 inelna league-ah pariatna dinhmun a luahpui hnuin Sanjoy hian second division club Mohammedan Sporting lam zawmin a champion pui a, I League an inhlangkai.
Kolkata club langsar ni ṭhin laka Sanjoy Sen-a hnathawh Mohun Bagan-in an hmuh hmaih lo a, sum tam tak sengin an lalut. Kum 56-a upa coach hian a season hmasa berah kum 13 hnua a vawi khat nan league-ah Bagan a champion pui a, nikumah Federation Cup nomawi a chawipui bawk - kut ruaka tun season mangṭha a duh dawn lo.