Bernabeu-ah Ancelotti a kir dawn ; Bayern hna a awlsam dawn lo

Real Madrid chuan zanin dar 12:15 hian Santiago Berna­beu-ah Bayern Munich an lo mikhual dawn. Spanish club hian Champions League knock out stage bikah first leg-a hnehna an chan tawh chuan tlang loh an la nei ngai lo; Carlo Ancelotti-a'n a club hlui lakah fiahna hautak a hmachhawn dawn.

Kar hmasa khan Allianz Arana-ah team pahnihte hi Cham­pions League quarterfinal first leg khelin an intawng tawh a, Cristiano Ronaldo goal hnih hmang­­in khualmualah Real 2-1 in an chak - Portugal captain hian European competition-ah goal 100 a khung tling tawh a, player dang zawng zawng chunga leng a ni.

Beiseina...

Bayern hian an intawn hma­sak ṭumin striker Robert Lewan­dowski chu a dar (shoul­der) na vangin an chhawr thei lo. Poland intenational hi kar­tawp Bundesliga-a Bayer Leverkusen nen goal awm loa an inhnehtawk ṭum pawhin a la inlan lo, zaninah erawh khelmual chhungah a hmel a inlan theih ngei beisei a ni.

Kum 28-a upa Lewandowski hian Pathianni khan team training a zawm leh tawh, tun season inelna hrang hranga goal 38 khung thei hi Real tlarhnung tan ven ngun ngai bik tur a ni. Bayern tan Champions League match 32 a khelh aṭangin goal 22 a khung tawh.

Bayern captain Philipp Lahm chuan, "A harsa hle dawn tih kan hria, chak tura rinkai zawk kan ni lo bawk. Mahse, Madrid-ah hian hnehna kan chang thei tih kan hria a, beiseina nen kan lenglut dawn a ni," tiin a sawi.

German champion Bayern hian treble champion nihpuitu Jupp Heynckes a chawlh avangin Pep Guardiola an lalut. Barcelona manager hlui hian season thum a enkawl chhungin Champions League semifinal a thlen pui ziah a, final a lut lo - Real, Barcelona leh Atletico Madrid lakah a tlawm.

Pep a chhuah hnuah Ance­lotti-a'n Bayern a enkawl, Italian manager hi 2014 Cham­pions League-a Real Madrid champion puitu kha a ni. Ancelotti hian a naute chu Bundesliga-ah point riatin hma a hruai fal pui tawh, Europe-a hlawhtling tur erawh chuan a khelmual hriat chian tawh hmuna hnehna a chan a ngai dawn.

Kum 57-a upa Ancelotti chuan, "Kan tan kawng a la inhawng a ni tih hi kan ringhlel lo a, kan theihna zawng zawnga khel chhuak turin Spain kan pan. Lewandowski-a'n training a neih leh tawh avangin player dang pawh an phur phah hle," tiin a sawi.

Bayern hian an khelmuala an hneh loh Real Madrid an hmachhawn dawn avangin an hna hi a awlsam dawn lo tih chu a chiang. Chutihrualin first leg-ah khan an goal hmahruai khungtu Arturo Vidal-a'n penalty a hlah a, minute 61-naah Javi Martinez chu hnawhchhuah a ni bawk - Bayern hian semifinal lut tura beiseina an la nei thiang.

Real an lian

European champion vawi 11 ni tawh leh Champions League nomawi kawl mektu Real Madrid hian kar tawp La Liga inkhelah Sporting Gijon 3-2 in an hneh hram. Inrinni zana El Clasico an khelh hmain Bayern lakah thapui an thawh hmasak a ngai dawn.

Zinedine Zidane-a'n inkhel hautak an hmachhawn zui dawn tih a hriat avangin Gijon lakah a player ṭha tam zawk a chawlh hahdamtir. Bayern 2-1 a hnehtu zinga player pakua ngawt a siksawi a; Cristiano Ronaldo, Gareth Bale leh Karim Benzema te chu squad-ah pawh telh an ni lo - BBC hi Bayern hmachhawn tura dahṭhat an ni.

Tottenham aṭanga Real zawmtu Bale chuan, "Cham­pions League hi chu Real Madrid tan a pawimawh bik, vawi 11 kan champion tawh a, nomawi dang tam zawk chawi belh pawh kan duh. He inelna liana final lut tur chuan inbuatsaihna ṭha bakah infuihphur ṭhat a ngai tel bawk. Kan team hi kan inbuk tawk hle a, inrintawkna nen kan khel a nih chuan eng team pawh kan hneh thei," a ti.

Wales international Bale hian a chawnah hliam tenau a nei nia sawi a ni a, khawthlang media ṭhenkhat chuan Bayern bakah kartawpah Barcelona a hmachhawn thei dawn lo niin an tarlang. Mahse, he thu buatsaih lai thleng hi chuan Real Madrid lam chuan an player hliam chung­changah thuchhuah an la nei lo.

Europe club liante inelna sang ber Champions League-ah hian a kum zawna champion an la awm ngai lo, La Liga hmahruaitu Real hian club lian dangte tih theih loh an ti dawn a nih chuan an thiampuipa Ronaldo a pawimawh leh ang.

Manchester United forward hlui Ronaldo hian tun season-ah beisei a phak lo. Mahse, Bayern mualah a thiam zia a pholang leh tawh. Thla sarih chhung zet UCL-a goal khung loa a kaltluan tawhna chu a tawp leh tawh a, Champions League inelna bikah a goal 97 neih tawh belhchhah a tum ngei dawn.