India aiawh tur Jeho-a

Jeho Himnakulh­pui­ngheta chu 2017 Belgium Junior and Cadet Open khel tur India team-ah a tel. Mizo naupang duh­awm Jeho-a telna team-ah hian player 14 an awm a; nimin tlai khan Delhi aṭang­in inelna neihna tur hmun Belgium an pan.

Junior and Cadet Open hi April 19-23 chhungi­n khelh tur a ni a, 11Even Sports 78th Cadet and Sub-Junior Na­tional Table Tennis Championship 2016 champion Jeho-a hi cadet boys team, singles leh doubles-ah a inlan ang.

TT inelna huangah national level-ah chuan cadet hi U13 a ni a, sub junior hi U15 a ni thung. Mahse, international-ah chuan sub junior hi awm loin kum 15 hnuailam inelna chu cadet tih a ni. Hei vang hian sub junior lama sulhnu nei tawh Jeho-a pawh hi cadet-ah a inlan dawn.

Inelna hmachhawn tur hian India hian April 8-16 chhung khan Pa­tiala, Punjab-ah camp an buatsaih a, national ran­king-a a sang panga chin an kalkhawm - inelna tak hmachhawn tur hian top 3 thlanchhuah leh an ni.

India sub junior num­ber 1 Jeho-a chuan, "Inelna hmachhawn turin kan inbuatsaih ngawrh em em a, zing leh tlai mai bakah chhunah pawh rim takin kan thawk. Ram tan kan inkhel dawn a ni a, ṭha taka inelna ka hma­chhawn theih nan Mizo mipuite ṭawngṭai puina ka ngen," tiin Vanglaini a hrilh.

Kumin Belgium Ju­nior and Cadet Open-ah hian India bakah khaw­vel ram hrang hrang Ar­gentina, England, Spain, France, Italy, Mexico, Ne­therlands, Poland, Russia, Sweden, Thailand, Hungary leh USA aṭang­in TT khel thiam an pungkhawm ang.