Dan theih loh Sebastian Vettel
Pathianni zana tlan zawh tak Bahrain Grand Prix-ah Sebastian Vettel chu pakhatna a ni. German driver hi tun season-ah vawi hnih pakhatna a nihna a ni a, intlansiak pathum an hmachhawn tawhah point 68 hmuin driver championship hmahruaitu a ni a, pahnihna Lewis Hamilton aiin point sarihin hma a hruai fal ta.
Bahrain-a intlansiakah hian world champion vawi thum ni tawh Hamilton chu pahnihna a ni. Mercedes driver hi pit stop hman chungchangah dan a bawhchhiat avangin second nga hremna a hmu. Lap 12 tlan tur a la awmah Vetttel a phak lohna chu second 12 zet a nih phah a, lap 57 an tlan zawh meuh chuan Ferrari driver a chungnung hle.
Red Bull car khalh chunga world champion vawi li ni tawh Vettel hian Ferrari car a khalh hnuah Grand Prix panga a hnehna a channa chiah a ni a, Formula 1 team hlun hian motor intlansiakna sang bera vawi 226 hnehna an channa ni a thlen pui a ni.
Kum 29-a upa Vettel chuan, "Zan nuam leh hlimawm kan tawng leh ta. Mimal thil tih a ni lo a, kan team thawhrimna leh inbuatsaihna ṭhat vang a ni. Season kan ṭan chauh a ni a, kawng thui tak zawh tur kan la nei. Tunah chuan April 30 a tlan tur Russian Grand Prix atan ngaihtuahna kan seng ṭan leh nghal ang," a ti.
Hamilton pawhin intlansiak chungchang sawiin, "Second nga hremna ka tawk a, ka mimal ai mahin team tan a pawi tih ka hria. Ka kum a upa ve zel a, ṭha taka dan leh hrai zawm thei tura ngaih ka ni. Chutih rualin inelna hautak leh khirhkhan kan hmachhawn a nih chuan duhthusam ang vekin thil a kal thei lo," a ti. Hamilton hian driver championship-a a tluk loh Vettel chu a lawmpui thu a sawi tel bawk.
Mercedes a khalh hnua a vawi khat nan Valtteri Bottas chuan pole position aṭangin bul a ṭan a, pathumnaah a thleng. Driver championship-a a langsar pawl ni phak tura ngaih Red Bull car kalhtu Max Verstappen chu lap 11-na lekah car break fail vangin intlansiak a tlan chhunzawm thei lo.
Force India-in a ti kimtu an nih satliah loh zia an lantir leh. Sergio Perez chu pasarihnaah thlengin Esteban Ocon chu 10-na a ni bawk - Perez hian driver championship-ah point 14 hmuin pariatna dinhmun a luah.
Bahrain Grand Prix Results
# Driver Team
1 Sebastian Vettel Ferrari
2 Lewis Hamilton Mercedes
3 Valtteri Bottas Mercedes
4 Kimi Raikkonen Ferrari
5 Daniel Ricciardo Red Bull
6 Felipe Massa Williams
7 Sergio Perez Force India
8 Romain Grosjean Haas
9 Nico Hulkenberg Renault
10 Esteban Ocon Force India