Singapore Open champion Praneeth

Pathianni a khelh zawh tak Singapore Open-ah Sai Praneeth Bhamidipati chuan Kidambi Srikanth hnehin champion nomawi a chawi a, badminton inelna ngaihhlut Super Series title a lak hmasa ber a ni.

World number 30 Praneeth hian world number 17 Srikanth lakah minute 54 chhungin 17-21, 21-17, 21-12 in hnehna a chang. Indian badminton chanchinah Indian shuttler pahnihte Super Series final-a an inhmachhawn vawi khatna a nih avangin Singapore Open hi Badminton Assiciation of India tan a hlu hle.

Kum 24-a upa Praneeth chuan, "Ka inkhelh ve tawh chinah chuan ka chetṭhat ber ṭum a la ni hialin ka hria. Hnehna ka chan hi kan chhungkua, coach Pullela Gopichand leh academy lama a thawhpuite tan ka hlan," tiin a sawi.

Singapore Indoor Stadium-a hmeichhe singles final-ah Tai Tzu Ying chuan Olympic champion Carolina Marin chu minute 38 chhung lekin 21-15, 21-15 in a hneh ve bawk. World number 2 Marin hi hmanni lawk khan India Open final-ah PV Sindhu lakah a tlawm tawh bawk.