A vawi 10 nan Nadal-a'n nomawi beisei

Tunkar chhunga khelh tur Monte Carlo-ah Rafel Nadal chuan a vawi 10 nan champion a tum. Clay court tournament-ah hian world number 1 Andy Murray leh he hmuna vawi hnih champion tawh Novak Djokovic te pawh an inlan ang.

Kum 2003 khan khatih hunlaia rawlthar duhawm Nadal-a'n Monte Carlo-ah hian Albert Costa a hneh, Grand Slam vawi 14 champoin tawh Nadal-a'n world number 10 chin player a hneh hmasak ber a ni - he hmunah hian vawi kua ngawt a champion zui tawh bawk.

Spain tlangval Nadal chuan, "Kum 14 liam ta kha ka la hre reng, tournament lian ka khelh hmasak ber a ni a, rilruah a cham reng tawh ang. Kuminah hliam nei loin ka khel thei mek a, hlawhtlinna chang turin beiseina ka nei sang hle," a ti.

Nadal-a'n kuminah Australian Open leh Mia­mi Open final a lut tawh a, a elpui lian ber Roger Federer a hneh lo ve ve. Swiss star hian French Open hma chu clay court tournament khelh a tum loh thu a sawi avangin Monte Carlo-ah hian a hmel kan hmu lo ang.