Lions ngamtu Mumbai Indians

Pathianni tlai India Premier League inkhelah Mumbai Indians chuan wicket rukin Gujarat Lions an hneh a, an mi­khualna ramah Gujarat tan Brendon McCullum chuan run 64 zet vaw chhuak mah se a team a chhan zo chuang lo.

Wankhede Stadium, Mumbai-a inkhelah Gujarat an bat hmasa zawk a, over 20-ah run 176 siamin wicket li an hloh. Gujarat tan McCullum bakah Dinesh Karthik chuan run 48 siamin a tawp thleng dam mah se opener Dwayne Smith chu run siam loin a out thung.

Mumbai Indians bat hun a thleng a, over 19.3-ah an target umphain wicket li chiah an hloh. Mumbai tan che ṭha fal sawi tur awm lo mah se Nitish Rana (53), Rohit Sharma (40) leh Kieron Pollard (39) te an inthlawp ṭhat avangin hnehna an chang.

Pathianni zan inkhelah Rising Pune Supergiants chuan run 27-in Royal Challengers Bangalore an hneh bawk a, player che ṭha fal sawi tur an awm lo. Pune hi bat hmasa zawkin over 20-ah run 161 an siam a, wicket riat an hloh.

RCB-in Virat Kohli hoin target huhphurawm loh ni a lang um mah se over 20-ah run 134 bak an tlin thei lo a, wicket kua hlohin a tlawm zawkah an ṭang ta a ni. Zanin dar 8:00-ah inkhel pakhat chiah a awm dawn a, Gujarat Lions leh Royal Challengers Bangalore an inkhel ang.