Milan leh Napoli inhnehtawk

Stadio San Paolo-a inkhelah goal li a lut a, mualneitu Napoli leh an mikhual AC Milan te chu 2-2 in an inhnehtawk. Gennaro Gattuso-a'n player leh coach a nih hnua sulhnu a neihna Milan hmachhawn leh chu a boruak a danglam thu a sawi.

Pathianni zan Serie A inkhelah hian Milan tan Theo Hernandez leh Franck Kessie ten goal an khung, Napoli lamin Giovanni Di Lorenzo leh Dries Mertens te hmanga khungin point khat ve vein an insem. A club hlui a hmachhawn chungchang sawiin Gattuso chuan, "Mi puitling leh player pangngaia min chher chhuaktu Milan hmachhawn chu a harsa hle mai, rilru a kal thuiin a lungchhiat thlak zawng pawhin a ngaihtuah theih.

"Milan hi tun dinhmun ka thlen theih nana kawng engkima min siam liantu an ni, team dang enkawl tawh mah ila kei chuan ka theihnghilh dawn lo. Football a nih avang erawh chuan hneh ngei tumin mikhual ka thleng thung," a ti.

Italian manager Gattuso hian Milan hi tun hmain Coppa Italia final a hruai thleng tawh a, a chak lo lamah a ṭang. Kuminah erawh Napoli hi final a hruai thleng leh a, team ṭha zawk Juventus hnehin nomawi an chawi.

Napoli leh Milan tan season thara Champions League khelh beiseina la thamral chiah lo mah se kawng a zim tawh a, European club football-a inelna sang pahnihna Europa League khelh phak chu an tum tur a ni tawh zawk ang.