Wimbledon khelh dan tur a hriat ta

Tennis tournament upa ber tiin an sawi ṭhin a, Grand Slam pali zingah chuan grass court-a an khelh awmchhun a ni bawk - Wimbledon 2022 khelh dan tur an pawt (draw) fel ta. Novak Djokovic-a'n match hmasa berah South Korean tlangval Kwon Soon-woo a tum dawn.

June 27, Thawhṭanni aṭangin inelna neih ṭan a ni dawn a, vawi hnih champion tawh Rafael Nadal chu seeded pahnihna niin, ani hian a bul ṭan nan world number 42 Francisco Cerundolo a hmachhawn ve thung ang.

Hmeichhe lamah champion tura rinkai ber, world number 1 ni bawk Iga Swiatek chuan qualifier aṭanga in vaw kai Jana Fett a tum thung ang. Poland nula hian tun hnaiah hneh loh a tawng ngai meuh lo, a zawnin match 35 chu a chak tawh, inrintawkna a nei sang dawn hle.

Nadal-a beiseina
Rafael Nadal-a'n season hmasa a hmang ṭha lo a, kephah hliam vangin season chawhnu lam phei chu a khel thei lo. Kuminah erawh a hliam hi 100%-in dam chiah lo mah se beisei phak baka ṭhain a khel mek.

Australian Open leh French Open nomawi a chawi tawh a, 2019 hnua a vawi khat nan Wimbledon hi a khel dawn. Spanish star hian a match hmasa berah Francisco Cerundolo a khel ang, a kaltluang a nih chuan semifinal-ah seeded pariatna Matteo Berrettini a hmachhawn thei dawn.

Kum 36 mi Nadal chuan, "Ka beisei aiin kan enkawl hlawhtling," tiin a ke hliam chungchang a sawi a, tun hnaiah exhibition match a khelh theih bawk avangin player hlauhawm berte zinga mi a nih phak a rinawm.

Grand Slam title 22 nei tawh Nadal hian 2008 leh 2010 khan Wimbledon title hi a lo la tawh, a hnu lamah erawh a la hlawhtling leh thei rih lo. Kuminah hian a champion thei a nih chuan major title nei hnem ber a nihna a sawhnghet ang.

Rinkai Novak
Novak Djokovic hian season bul a ṭan fuh lo. Hripui laka invenna a lak duh loh avangin Australian Open a khel thei lo, a hnu lamah US a zin thei lo zui - clay court inelna hmachhawn mah se duhthusamin a la khel chhuak chuang lo.

Wimbledon champion lai hian match hmasa berah Kwon Soon-woo a tum dawn, world number 2 tan first round hi chu a harsa vak lo tura ngaih a ni; chutihrualin main draw khel phak chin hi chu zuam sual theih an ni ve tho bawk.

Serbian star hian world ranking lamah pakhatna dinhmun a luah ṭhin pawh a hloh, a inkhelh tam loh bakah tournament a khelh hoah duhthusam result a neih loh vang a ni; atan chuan All England Club hi a khelh dan bik insiamṭhatna hun a ni thei ang.

Wimbledon hnuhnung pathum - 2018, 2019 leh 2021-ah te Djokovic hi a champion vek; 2020 erawh hripui leng vangin an khel lo. Hard court-a inkhel thiam tia hriat ṭhin kha grass chunga roreltu a ni mek a, tun ṭumah pawh hian midang tan hmachhawn a harsa dawn.

Hliam leh buaina
Russia leh Ukraine buaina vangin United Kingdom sorkar a inrawlh a, tennis thuneitu lam pawhin sorkar thu leh hla an ngaihchan tel a ngai. Kumin Wimbledon-ah hian Russia leh Belarus player-te chu an tel ve a rem dawn lo.

World number 1 Daniil Medvedev chu inlan thei lo tur langsar ber a ni, amah ang bawka Russian player Andrey Rublev pawh a tel dawn lo. World number 7 Rublev hi ram pahnih an buai tirh khan, "Indo lo hram ang u," tiin a lo au chhuak tawh, awmzia erawh a nei ta lo a ni.

Mipa leh hmeichhe tennis thuneitu sang ATP leh WTA chuan hma an la ve nghal, ram pahnih player an inlan theih loh vang hian world ranking point an chhiar dawn lo; champion lai Djokovic tan a pawi, champion leh pawh ni se ranking lamah Medvedev a phak lohna a zau sawt dawn tho.

Hliam vangin Alexander Zverev a inlan thei dawn lo. German tlangval hi French Open-a Nadal nen an inkhelh laiin a hliam, world number 2 hi a hliam a la dam loh avangin a inlan thei dawn lo a ni, major title la tur chuan inelna dang a nghah leh a ngai phawt dawn tihna a ni.