Inter Village Football boruak a ‘HOT’ nghal

LBS Suzuki All Mizoram Inter Village Football Tournament 2022 chu khelh ṭan a ni ta a, chanchin danglam hriat tur a awm nghal. Football thiam veng Dinthar chuan Kolasib Ṭumpui hneh loin an tla nghal a, inkhel dang thlir pawhin khawpui team zingah thingtlang team hneh loa tla an awm nghal bawk.

A entlak
RG Stadium-ah inkhel pathum a awm a, inkhel hmasa berah Khawlailungin Tlungvel 3-2 in an hneh. Tlungvel tan Bengaluru FC reserve tana khel winger Lalthangliana'n goal hnih khung mah se Khawlailung an chungnung ta zawk. Khawlailung player K. Vanlalhriatzuala lian lo mah se khelmualah a tlangnel a, goal hnih a khung. Mizoram Police player Lalthantluanga'n goal hnih a khung bawk.

Chaltlang Lily Veng leh Lenchim inkhel a hmuhnawm tawk lo a, Lenchim 2-1 in an chak. Mi 350 vel lek chenna khua Sekhumin Aizawl Venglai an barakhaih teuh hle. PC Malsawmtluanga'n Mizoram tan pawha khel tawh keeper Lalawmpuia chu halfway line aṭangin a pet khum a, injury time-ah Aizawl Venglaiin an sut hram. Penalty-ah erawh Mizo keeper tawnhriat nei ṭha AwP-a'n a theihna a rawn pholang a, Aizawl Venglai an chak.

RG Stadium-a inkhel entuten fai takin stadium an kalsan a, Mizoten fai kan tlin tih a takin a lang.

Lengpuiah buaina
Lengpuia inkhel hmasa berah Dawrpui Vengtharin North Vanlaiphai chu 3-0 in an hneh a, inkhel erawh goal aṭanga teh chi a ni lo. Team pahnih an inkhel tawk a, Bengaluru leh Sudeva Delhi tana khel tawh Sairuatkima awmna Dawrpui Vengthar an vannei ta zawk.

Dinthar leh Kolasib Ṭumpui inkhelin sawi zui a hlawh. Team pahnihin khelmualah an ṭha tih an pholang a, an inhnehtawk hle. Amaherawhchu 'upset' a thleng a, Ṭumpuiin tualchhung football-a sulhnu nei ṭha Dinthar chu 3-2 in an hneh.

Ṭumpui hi chak tur khawpin an khel ṭha a, penalty an hlah zawk. Dinthar pawhin chak phuah an inngai a, referee vanga chak loah an inngai - penalty an hmu ve lo chu an hrethiam lo. Tun inelnaa buaina hmasa ber chu Lengpuiah a thleng a, buaina hi Dinthar leh referee chhantu ground duty Lengpui inkara thleng a ni.

Inkhel hnuhnung berah Saikhamakawnin goal hnih khung hmasa mah se Lungdaiin goal ngain an chhanglet. Lungdai hian player langsar an kawl lo a, amaherawhchu game nung ṭha tak an an pho chuak.

Thingtlang an vul
MFA Ground-ah Aizawl aṭanga team pahnih inlan mah se inkhel palia chakte chu thingtlang vek an ni. Inkhel hmasa berah I League club Sreenidi Deccan forward Lalromawia hoin Samlukhaiin Saiphai 3-1 in an hneh.

Jt VC Lawngtlaiin Durtlang North chu 6-1 tehmeuhin an sawp a, nimin inkhel bika insawpna nasa ber a ni. Damparengpui VC-in artificial turf pawh ni lo, 11 field-a an inkhelhna hmasa berah Muanna Veng chu 5-2 in an hneh. Darlawngin Leng hneh turin harsatna an tawk lo a, 4-1 in hnehna an chang bawk.