Jurgen Klopp-a'n Sadio Mane a ui

Bayern Munich forward thar Sadio Mane chuan Liverpool a chhuahsan chu Reds manager Jurgen Klopp chuan a ui thu a sawi - Mane hian pound maktaduai 35-in German champion hi a zawm.

Mane chuan, "Klopp pawh a ngui a, mahse, duhsakna min hlan. Kei pawh a chungah hian ka lawm kumkhua ang. Kum ruk zet chu mi fel tak tak leh fans ṭha takte nen Liverpool-ah hun kan hmang ho a, ka chhuahsan avangin an lawm lo hle.

"Mahse, hei hi hringnun chu a ni a, chona thar hmachhawn ka duh a ni. Klopp hi pa ṭha tak a ni a, Liverpool-a cham ngei turin min duh mah se ka dinhmun pawh a hrethiam em em a ni," a ti.

Klopp pawhin Mane thutlukna a hriatthiam thu sawiin, "A thutlukna ka hriatthiam ang chiahin fan-te pawhin an hriatthiam ka beisei. Liverpool-i hmangaih a nih chuan Sadio pawh i hmangaih tur a ni a, sawi buai theih a ni lo.

"Kan hloh hi Bayern hlawkna ni mah se Sadio thutlukna pawmpui hi a theihin ka hria. Keimahni min hmachhawn hun tih lohah chuan a match khelh apiangah hlawhtling ngei turin duhsakna kan hlan a ni. Ropui takin a khel zel ang tih ka ring tlat," a ti.

Kum 30 mi Mane hian Anfield-a a cham chhungin inelna hrang hrangah match 269 khelin goal 120 a khung a, assist vawi 48 a nei - Premier League, FA Cup, League Cup, Champions League, UEFA Super Cup leh FIFA Club World Cup-ah a champion a, nomawi chawi theih a chawi kim.

Mane chuan, "Liverpool-ah khan nomawi hlawh theih zawng zawng kan hlawh chhuak a, Bayern hi an ṭhatzia TV aṭangin ka lo hmu fo tawh a, Champions League-a an khel ka en tawh ṭhin.

"Khawvela club ṭha ber pawl an ni a, hlawhtlinna ropui tak kan chan theih ka beisei tlat a ni," a ti a, Bayern a zawm chhan chu coach Julian Nagelsmann vang a nih tel thu a sawi bawk.

Mane chuan, "Julian nen kan inhmu a, kha kha ka tan chuan a pawimawh takzet. A hmachhawp leh tactical presentation a neihte khan min hneh a, a team-ah khan keimah ka inhmu nghal a, Bayern zawm turin rilru ka siam fel nghal a ni," a ti.

Liverpool tana Mane khelhpui, Egyptian striker ropui Mohamed Salah chuan a ṭhianpa hi thlahin, "Zinkawng hlimawm tak a ni a, hun duhawm tak min tawntir avangin lawmthu ka hrilh a che - i hma hun atan duhsakna ka hlan che a, kan ngai em em vek ang che," a ti - Reds fan-te lung a leng ang.

Bayern-in Mane an lakluh lai hian striker Robert Lewandowski erawhin chhuah a duh thu ualau takin a sawi tawh a, hetihrual hian club chief executive Oliver Kahn chuan, "Engmah inthlak danglam a la awm - kan hnenah 2023 thleng contract a la nei a, training kan neih hunah a rawn inlan kan beisei," a ti - hralh an tum loh hmel hle.