I League champion-in ISL khel dawn
Season thar aṭang chuan I League champion-in Indian Super League an khel tawh dawn - he thu hi Asian Football Confederation (AFC) hruaitute chuan an sawi chiang tawh.
October 14, 2019 khan Kuala Lumpur-a Asian Football Confederation (AFC) hmunpuiah All India Football Federation (AIFF) chuan Indian football kalphung tur hi a lo puang tawh a, season thar aṭanga hman ṭan tur a ni.
AIFF ruahmannaa a lan dan chuan 2022-23 season aṭangin I League champion-in ISL an khel tawh dawn - mahse, he thuchhuah an siam hnuah hian AIFF an ngawi vang vang a, I League club-te ngaih a ṭha lo.
Ningani khan AIFF buaina chingfel tura lo zin FIFA-AFC hotute chu I League club aiawhten inbiakna an lo neihpui a, AFC chuan AIFF ruahmanna lo siam tawh sa chu kaltlangpui tur a nih thu an sawi - I League club aiawh hian Gokulam Kerala, Mohammedan Sporting, Sreenidi Deccan leh Churchill Brothers hotute an tel.
Hahdam rawh u
I League club neitute hian FIFA-AFC hotute chu AIFF aṭanga thu an hriat zui loh avanga an hlauhthawn thu an hrilh a, mahse, football thuneitu sangte chuan I League club neitute chu hlauthawng lo turin an lo ti.
AFC general secretary Datuk Seri Windsor John chuan, "Kalphung duansa thlak danglam tumna a awm ka hre lo a, a awm a nih pawhin AIFF committee tharin, club leh thuneitute rawn chungin thutlukna a siam chauh ang.
"Tuna kalphung tur ruahman sa hi zawm ngei a ṭul a ni," tiin a sawi a, AFC hotupa thusawi hi rintlak tura ngaih a ni - hetiang a nih chuan Mizoram leilunga ISL inkhel enna chance a awm chho dawn tihna a ni a, chumi thleng tur erawh chuan Aizawl FC-in season tharah I League nomawi an chawi a ngai dawn thung.
AIFF general secretary kal chhuak Kushal Das leh general secretary lailawk Sunando Dhar te chuan ruahmanna hi kaltlangpui a nih tur thu an lo sawi tawh a, mahse, meeting an neih lawk loh avangin I League lam hi an hlauthawng a ni ber.
Hlauhthawnna chu
Gokulam Kerala FC neitu VC Praveen chuan, "FIFA-AFC thuneitute hnenah hian kalphung ruahman sa hman a nih dawn loh chuan, kum 2019 hma lama kan kalphung ang kha hman leh mai turin kan dil a ni," a ti.
Kum 2019-a Indian football kalphung thar tlangzarh a nih hma khan I League chu top league a ni a, I League champion-in tuna ISL league round winner-in an chan tak AFC Champions League hmun ruak pawh an chang ṭhin.
Sree Gokulam Group of Companies director (Operations & Public Relations) Praveen chuan, "AIFF hnena lehkha kan ziak a, Kushal Das-a'n kalphung thar kalpui thuai a nih tur thu a sawi.
"Mahse, engatinge meeting min neih pui loh? Kan player-te pawhin ram tana khelh an duh avangin ISL club an pan zel. I League aṭangin player thlan an ni ngai lo - ISL nen hian league kal ṭhiang tur a nih laiin dan, promotion, broadcast leh thil engkim mai kalpui dan hi a fair lo em em a ni," a ti.
A thar kan duh!
I-League club-te hian Supreme Court-in Indian football inrelbawlna kalpui tura a ruat lailawk committee of administrators (CoA) te chu a rang lama meeting neihpuiah an sawm bawk a, promotion leh relegation kalpui chungchang sawipui an duh.
Churchill Brothers CEO Valanka Alemao chu thawm nei na pawl a ni a, Goan nula hi top division-a chhiar theih league pakhat chiah neih duh a ni a, FIFA-AFC thuneitute hnenah pawh hei bawk hi a thlen.
Alemao chuan, "Top league reng rengah chuan promotion leh relegation a awm zel a, player-ten season khatah a tlem berah match 40 - 45 inkar an khel tlangpui bawk. India-ah erawh match tlemtê kan khel a, engatinge league pakhat kan neih mai loh? Hei hi chu AIFF committee tharin an ngaihtuah a ngai a ni," a ti.
Churchill CEO chuan sawi zawmin, "Kan player-te zawng zawngin ISL khelh an duh vek a, ui tak chung pawhin kan kaltir zel an ngai - kan player-te duhna kan hrethiam a, an kal zelna tur dal kan duh lo. ISL hian sum tam tak an seng tih kan hria a, mahse, kan vaia kan ṭhat tlanna tur ngaihtuah a ngai," a ti a, league pakhat neih a duh.
Ruahmanna chu
AIFF-in ruahmanna a lo siam tawh aṭanga a lan danin season thara (2022-23) I League champion chu ISL khel tur an ni a, 2023-24 champion pawhin an khel ang - mahse, relegation a la awm dawn lo.
I League champion hian ISL club dangin kumtina an chawi ṭhin, 'participation fee' an tih, vaibelchhe 10-15 inkar chu an pek ve a ngai dawn lo a, national club licensing criteria an paltlang ngei a ngai thung.
Chutihrual chuan ISL club ten an insem ṭhin 'central revenue' an tih, league aṭanga hlawkna an hmuh sumte chu I League champion hian an dawng ve lo ang.
Season hnih hnu, 2024-25 season-ah hian relegation & promotion hman kawp ṭan a ni ang a, league pahnih intiat tawk anga kal reng chu ṭhiah a ni bawk ang - heng zawng zawng thleng tur chuan an thutiama AIFF an din a ngai a, FIFA-AFC hotute pawhin an enpui a ngai bawk.