Vikings an che fuh thei lo

Mizoram Super League season 7-ah Chanmari Vikings an che fuh thei lo. An boruak han sang chho viau dawn mah se an chesual leh ṭhin, dinhmun ṭha taka an din hnuah pawh Zarkawt BCA an inpawhthlak tir, a tawpah 86-80 in an chak lo.

Chanmari Vikings hian Ningani zan inkhelah bul an ṭan fuh a, quarter hmasa pathumah an chungnung vek. Mahse, quarter hnuhnung ber bikah 26-11 teh meuhin an hniam fal a, hun rei tak chhung an hmahruaina chu a thlawn mai a ni.

An match hmasa zawkah Vikings hian inkhel hmuhnawm chhawp chhuak chungin Khatla TBL an ngam lo, a tawp lamah an vanduai. BCA lakah pawh hun pawimawh laiah bawk an chesual, insiamṭhat an mamawh takzet.

Champion lai Zarkawt BCA erawh Tuikual South laka an chetsual zauhna bak chu tihsual an la nei lo. BCA hian match sarih an khelh tawhah vawi ruk hnehna an chang thei, chak hnem ber niin table chung berah an awm.

Nilaini inkhel dangah Mission Veng Hotshots chuan Khatla TBL lakah 84-78 in hnehna an chang. Team thar ni mah se Hotshots an tlo viau, team ṭha leh tawnhriat nei ṭha zawk pawh an hneh thei zel, table-ah pahnihna an nih mek avangin 'Play In' khel turin an dinhmun pawh a ṭha ta hle.