Manchester City-in Champions League khel dawn

European football-a season hnih ngawt inlan thei lo tura hrem Manchester City hremna chu Court of Arbitration for Sport (CAS) chuan an hlihsak a, season tharah City-in Champions League an khel dawn. 

CAS chuan City hremna langsar ber, "An sum hmuh ṭhenkhat chu sponsorship aṭanga hmuh angin an lantir," tih chu hlihsak an nih thu an sawi a, UEFA an thawhpui ṭha tawk loa puhna erawh a dik tih an pawm. Chutihrualin CAS chuan UEFA-in City a chhuina kawnga an puih ṭhat tawk lohna chu kum hnih hremna atan ringawt chuan a sang lutuk niin an hria a, an sum chawi tur euro maktaduai 30 pawh euro maktaduai 10-ah tihhniamsak an ni. Manchester City chuan thuchhuah siam nghalin, "Kan thubuai ngaihtuahtu member-te thawhrimna avangin kan lawm takzet a, thutlukna hian kan dinna dikzia a pholang bawk a ni," an ti. 

November 2018 khan German chanchinbu lar  Der Spiegel chuan document an neih te tichhuakin City hi UEFA hnuaia Financial Fair Play (FFP) dan chu 2012-12016 inkara bawhchhiaah an puh a, an puhna hi Football Leaks aṭanga an neih a ni. 

City hian sponsorship aṭanga an sum hmuh te chu a tak aia tamin an tarlang ṭhin nia sawi a ni a, hei hian an sum lakluh chu tam tham tak anga lantirin player lakluh chungchangah FFP an bum theih phah. European football-a thuneitu sang ber UEFA hnuaia Club Financial Control Body (CFCB) chuan  Der Spiegel thuchhuah hi an chhuichiang nghal thuai a, February 14 khan German chanchinbu thuchhuah hi a dik thu an sawi. CFCB chuan an thubuai an chhuina kawngah City hian an thlawp ṭhat tawk loh thu an sawi bawk a, hei vang hian kum hnih chhung European football-a inlan thei lo tur leh euro maktaduai 30 chawi turin an ti. 

UEFA-in City chhui tura hma an lak tirh hian Manchester khaw club hian an lungawi lohna lantir nghalin CAS hnenah an kal a, UEFA-in an chhuina tur chu tihtawpsak turin an ngen. Mahse, CAS chuan City dilna hi hnawlin UEFA-in Premier League club an chhui hi an phalsak a, City hlauhthawn ang ngeiin hremna pawh a na nghal hle. 

City chuan UEFA hremna chu a dik tawk loh thu leh a nat mah mah thu an sawi a, CAS hnenah bawk an zualko tur thu an sawi nghal. An document a lo leak chu dan lo anga an lehkha pawimawh inchhuhsaknaah an puh bawk. 

Hei mai a ni lo - CFCB chu an thil chhuina kawngah rin tlak tawk lo leh ṭan lam neiah an puh. Hetiang boruak karah hian coach Pep Guardiola leh player langsar an nghin thu sawi rik a ni ve chhen bawk. 

Mahse, nimin tlaiah CAS-in an thutlukna an puang chiang a, infiamna khawvela thuneitu sang ber chuan, "CFCB thutlukna hi uluk taka zirchianin a felfai tawk lo a ni," an ti. Hei mai hi a ni lo - CAS hian City chuan UEFA an thawhpui ṭha tawk lo tih an pawm ngei a, "Mahse, UEFA an thawhpui ṭhat tawk lohna hi kum hnih chhung inhremna tur a ni lo," an ti bawk. 

City hi season thara Champions League khel turin an tling chiang tawh a, tun season Champions League last 16 second leg-ah Real Madrid an la mikhual dawn bawk - first leg-ah 2-1 in an chak tawh. UEFA chuan Swiss federal court-ah thubuai hi an la khing let thei dawn a, mahse 2020-21 season Champions League ṭan hma chuan thubuai hi ngaihtuah hman a ni kher lo ang.

CAS-in Manchester City hremna hlih sak takah chuan Premier League aṭanga Champions League leh Europa League khel turah nghawng a nei nghal. Thutlukna awm hma kha chuan Premier league pangana tan UCL beiseina a awm hman a, tunah erawh engkim a chiang tawh - pangana tan UCL a khelh theih loh.

Chelsea, Leicester City leh Manchester United te zinga pakhatin UCL an khel thei dawn lo. Europa League-ah pawh English club tan quota pathum chauh a awm avangin khelh phak a harsa dawn a, pakuanaa awm mek Arsenal tan erawh FA Cup aṭangin khelh dan kawng a la awm.