Futsal Introductory Workshop hmangin Futsal bul tan a ni ta

Nimin khan India rama a vawi khat nan Futsal Introductory Workshop chu RG Stadium, Mualpuiah neih a ni a, Mizoramah Futsal bul ṭan a ni ta.

Resource person atana hman Sanjay Kumar chuan futsal-a Mizoram harh hma chu lawmawm a tih thu Vanglaini palai a hrilh bakah Mizoram Football Association bak AIFF leh FIFA hriatpui pawl a awm loh thu a sawi a, Mizoramah tuna an kalpui hi Futsal dan dik taka bul ṭanna a nih thu a sawi.

Sanjay hi football leh futsal-a AIFF hnuai inelnaah senior manager a nih bakah, futsal-a Asian Football Confederation match commissioner a ni.

Futsal Introductory Workshop hi mi 56 in an chhim a, nimin khan futsal history, Asia rama futsal thlen chin, futsal dan, futsal leh football khai khinna te neih a ni a, practical hmanga sawifiah a ni bawk.

Sanjay chuan, "Football leh futsal hi ngaih pawlh loh tur a ni a, thil inang lo a nih rualin futsal thiam hi footballer ṭha nih theihna kawng ṭha tak a ni. Barcelona lar pui 'tiki taka' te hi futsal aṭanga chhuak a ni a, hlamchhiah a thiang lo," tiin futsal pawimawhna a sawi lang.

Sanjay chuan, "FIFA leh AIFF-in a hriatpui chu MFA a ni. Mizoram chhunga futsal khelte pawhin kal zel an duh chuan FIFA dan dik tak hmang se, mahni dan phuahchawp hmang mai loin MFA hnuaiah khel se, chu chu kawng dik a ni," tiin workshop chhimtute a chah.

MFA pawhin an hriatpuina ni lo inelnaa tel MFA/DFA/Zone FA registered player-te chu hrem an nih tur thu puangzar tawh a ni.

Trainee zinga mi Samson Ramengmawia chuan, "Futsal hi khawi khawiah emaw ka lo khel tawh ṭhin a, kan kalna apiangah dan a danglam a, tunah chuan FIFA dan dik takin MFA hnuaiah a khelh theih tur hi kan phur khawp mai," tiin a sawi a, ani hi footballer hlui leh coach ni mek a ni.

FIFA hnuaiah FIFA Futsal World Cup chu kum 1989 aṭang khan khelh ṭan a ni a, champion lai chu Argentina a ni. Asia ram zingah Iran chu pathumna an ni pha hial. India-ah erawh kumin aṭangin awmze neia kalpui tum ṭan niin Mizoram chu hma la hmasa pawl an ni.