Barcelona-in Juve lehthal an tum Allegri naute an thlamuang lo

Champions League semifinal tur turin Barcelona tan goal thum aia tam khung a ngai tawh. Zanin dar 12:15-ah Catalan club hian Juventus an mikhual dawn a, European football ngainatu tan en hmaih phal chi a ni lo ang.

April 21 zan khan Turin-ah quarterfinal first leg hi an lo khel tawh a, Italian champion Juventus hian Paulo Dybala goal mawi pahnih leh Giorgio Chiellini tauh luh hmangin 3-0 in hnehna an chang - 2015 final-a an hneh loh laka phuba la turin goal venhim ṭhat a pawimawh dawn.

Nou Camp boruak

Last 16-ah Barcelona-in PSG lehthal turin fans puihna an maw­mawh a, an mamawh ang ngeiin Catalan mipuiin Barca an ṭawiawm ṭha hle. Mipui 99,354 lenna Nou Camp-a an auhla chu 'In tan kan ding' tih leh 'Beiseina nen' tih a ni.

Juventus mikhual turin Bar­celona an inbuatsaih leh a, player-te theihna chu a pawimawh ber a ni nachungin fans hi sawi hmaih theih an ni lo. Tun ṭuma an thupui pawimawh tur chu 'Barca' tih leh 'Chhungkua kan ni' tih a ni ang; ‘More than a club’ hi an club motto a ni - boruak a dai lo khawp ang.

Turin club-in Barcelona khelmual an tlawh hnuhnung ber chu kum 2003 April thla kha a ni, Pavel Nedved leh Marcelo Zalayeta te goal hmangin 2-1 in hnehna an chang. Tunah hian Juve fans ṭhahnem tak chu hnehna hlado chham tumin Spain-ah an zin, inthlahrung leh ngawi reng chunga inkhel en an tum bik lo.

A la tawp lo?

Round hmasa lamah Barcelona hian last 16 paltlang turin Paris St-Germain an hneh. Paris-a an intawn hmasakin Barca hi 4-0 in an tlawm, tla tawha ngaih an ni. Mahse, second leg-ah Luis Enrique naute hian 5-1 in an hneh let a, inkhel pahnih belhkhawmah 6-5 in an tlang - French champion an hawihai hle.

PSG an hneh ṭuma goal hnih a khung baka chakna goal Sergi Roberto khung tur siamsaktu Neymar a la beidawng lo. Barzil captain chuan, "Champions League-ah chuan eng match pawh hi awlsam a awm lo. PSG lakah hnehna changtu tho kha kan la nih avangin Juve pawh hi kan lehthal theih ka beisei," tiin a sawi.

Massimiliano Allegri hian AC Milan a enkawl laiin Barcelona ṭhat zia a hrechiang tawh, tun thlengin a la theihnghilh lo ang. Kum 2012-13 season khan UCL last 16-ah Allegri-a enkawl Milan leh Tito Vilanova kaihhruai Barcelona hi an lo intawng tawh.

San Siro-ah, Milan hian Kevin-Prince Boateng leh Sulley Muntari goal hmangin 2-0 in hnehna an chang. Beiseina sang tak nen Nou Camp an pan; Barca hian Lionel Messi, David Villa leh Jordi Alba te goal hmangin 3-0 in an lo chhang let a, an tlang daih - Juve manager hian semifinal lut tur chuan fimkhur a ṭul zia a hrechiang tawh khawp ang.

Juve striker Gonzalo Higuain chuan, "Season duhawm kan hmang mek a, inrintawkna pawh kan nei ṭha. Tunah hian Camp Nou-a inkhel turin kan inpeih tawh, sithum faia hma kan hruaina hi a tam tawk em tih chu ka hre lo. Ka hriat chian chu hei hi a ni - inkhel a la tawp lo. Barcelona hian PSG lakah thil mak an ti tawh a, kan fimkhur a ngai dawn," tiin a ṭawng fimkhur hle.

Chiellini a fimkhur

First leg-a goal khungtu Chiellini chuan, "Minute 90 kan khel tawh a, a zatve chauh a la ni. Tunah chuan minute 90 dang hna hautak thawk tura inralrin a hun," tiin a sawi, Italian defen­der hian Barca tlarhma dang tura hna a khirhkhan dawn zia a hmuh hmaih lo.

Kum 32-a upa Chiellini chuan sawi chhunzawmin, "Khawvela hmatawng ṭha zual panga thlang chhuak ta ila, Barcelona aṭangin hming pathum a lang ang. Kan goal venhim kan duh a nih chuan an player ṭhate hi hmunawl kan pe tur a ni lo a, kan goal aṭanga hla thei ang berah kan dangchat tur a ni ang," a ti.

Barca hian kartawp La Liga-ah Lionel Messi goal hnih hmangin Real Sociedad an hneh a, hrem vangin Neymar a inlan thei lo. Santos captain hlui hi league lamah chauh hrem a nih avangin Juve a hmachhawn thei ang - Liverpool striker hlui Luis Suarez a inpeih bawk.

Old Lady (Juventus sawina) hian tlarhmaah chhuan tur an nei ve tho, a hming chu Higuain a ni. Khawvela player manto pathumna Higuain hian kartawpa an league match-a Pescara 2-0 a an hnehna inkhelah goal hnih hi a khung. Argentina striker bakah hian ram tana a khelpui Dybala an la nei bawk, Nou Camp-ah goal a lut tam a nih pawhin a mak lo ang.