Ka hun tawn san ber a ni - Khalid
Aizawl FC-in I League an khelh hmasak berah an relegate a, AIFF duhsakna dawnga season hnihna an khelh theih hnuah champion thei dinhmunah an ding. Mizo club nomawi chawi thei dinhmuna dahtu Khalid Jamil chuan a coaching career-a a thlen san ber a nih thu Vanglaini palai a hrilh.
Mizo club hian April 22, Inrinni hian Mohun Bagan an mikhual ang a, goal hnih china an chak chuan Mizoramah ngei India champion an ni dawn. Goal khata an chak a nih pawhin AFC hian an match hnuhnung bera Shillong Lajong an draw theih chuan nomawi an chawi tho dawn a, chutihrualin tun Inrinnia an chak loh erawh chuan Mohun Bagan an champion thung ang.
AFC coach Khalid Jamil chuan, "Ka coaching career-ah tun ang hun ka la thleng lo. Pressure sang tak kan hmachhawn dawn a, thawhrimna nen kan tum ram thlen ngei kan tum," tiin Vanglaini a hrilh.
Khalid-a hian kum 2009 aṭangin I League club Mumbai FC a enkawl ṭan a, Maharashtra club hi kum sarih chhung enkawlin vawi khatmah relegate pui lo mah se nomawi a chawi theih loh avangin an ban. Amaherawhchu tun season-ah nomawi duh vanga Khalid-a bantu Mumbai FC hi table mawngphahah an awm.
Mohun Bagan nen tu e dinhmun nge ṭha zawk tih zawhna chu Khalid chuan, "Ka player-te an dam ṭha a, theihtawp kan chhuah dawn. Hei bak sawi theih ka nei lo," tiin ṭum danga a tih ṭhin dan angin inkhel tur sawi lawk chiam a tum lo a, season tawp lamah pawh a zia a hloh lo.