Terry-a'n Chelsea a chhuahsan dawn

Chelsea captain John Terry chuan season tawpah Stamford Bridge a chhuahsan tur thu a tichiang ta. Kum 36-a upa defender hian May 2016 khan season khat dang cham turin contract thar a ziak a, manager thar Antonio Conte enkawlna hnuaiah hmun pawimawh a chan phak tak lohah chuan chhuah a thlang ta a ni.

Kum 1998-a Chelsea tana a match hmasa ber kheltu defender hi Blues player zinga nomawi chawi hnem ber a ni a, London club hi Premier League nomawi pali, FA Cup panga, Europa League pakhat, League Cup pathum leh Champions League nomawi pakhat a chawipui tawh.

Blues tan match 713 inlan tawhin heng zinga 578-ah hian captain armband a hreng a, Chelsea tan captain nichunga inlan hnem ber niin a pumpuia Blues tana inlan hnem lamah erawh Ron Harris leh Peter Bonetti tlukloin pathumna dinhmun a luah.

Kum 14 leka upa a nih laia Chelsea zawmtu defender chuan, "Hmabak tam tak ka la neiin ka hria a, mah se Chelsea-a ka la cham chuan hun ka nei tlem dawn tih ka hre tel bawk a ni," tiin inkhelh tam a duh vanga chhuak tur a nih thu a sawi a, tun season league match-a vawi li chiah inkhel bul la ṭantu defender thutlukna hi dem theih a ni lo.

Chelsea tan inelna hrang hranga goal 66 khung tawhtu defender chuan, "Ka thinglungah Chelsea hi a cham reng tawh dawn a, nomawi dang hun belh tur neichunga tun season mangṭha erawh ka la duh cheu a ni," tiin Premier League nomawi chawi ngei a duh thu a sawi.

Kum 2000-a Nottingham Forest-a loan-a a khel zawk tih loh zawng club dang tana la khel ngai lo defender chuan, "A hunah tak chhuah hi ka duh ṭhin a, club leh keima tan season tawpa ka chhuah hi a hun tak niin ka hria," tiin PFA Player of the Year chawimawina dawng thei defender panga zinga mi chuan a hunah tak thutlukna siamah a inngai.