Arsenal beiseina a la nung

Sawiselna, demna leh auh nawmnahna karah Arsene Wenger-a'n a naute chak ni hmel a hmuh pui ve leh ta. Thawh­ṭanni zan Premier League inkhelah Gunners hian Middlesbrough 2-1 in an hneh.

Arsenal hian season thara Champions League khelh an beiseina an chhi nung leh a, forward Alexis Sanchez-a'n freekick a pet luh bakah Mesut Ozil chuan chakna goal a hlap lut, Boro goal neihchhun hi Alvaro Negredo khung a ni - Gunners hian league match bikah January thla hnu lama khualmuala hnehna an chan lehna hmasa ber a ni.

Gunners hian an league match hnuhnung pakua aṭang­in vawi thum hnehna an channa chiah a ni a, match 31 khelh aṭanga point 57 hmuin table-ah parukna an ni, palina Manchester City an phak lohna chu point sarih niin City ai hian match khatin an khel tlem zawk.

Defender pathum!

Arsenal hian an league match hnuhnung zawka Crystal Palace an hmachhawn ṭumin inkhel thunun chungin 3-0 in an tlawm. Wenger-a'n an buaina sutkian dan tur a ngaihtuah, a chhanna chu goal venhim a ni. Defender rinrawl Laurent Koscielny a lo kir bakah Rob Holding leh Gabriel Paulista te chu tlarhnung laiah a dintir.

Kum 1977 khan Arsenal hian Derby an hmachhawn ṭumin tlarhnungah player pa­thum an lo dah tawh - Tony Adams, Martin Keown leh Steve Bould te an inkawp, kum 20 liam hnua a vawi khat nan 3-4-3 formation an hmang leh chiah!

Gunners manager Wenger chuan, "Crystal Palace lakah 70% ball possession kan nei a, mahse kan chak lo. Kum 20 chhunga a vawi khat nan tlarhnungah defender pathum ka dah, hei hian kei ang kumah tawh pawh mihring hi a la inthlak thleng theih a ni tih a lantir" tiin a sawi, Wenger hi kum 67-a upa a ni tawh.

Wenger chuan, "Season thar­a Premier League khelh leh ngei an duh avangin Middlesbrough khan an theihna zawng zawngin an khel, kan tan chuan fiahna ṭha leh hautak a ni. A sang pali zinga tel tur chuan kan inkhelh hmabak zawng zawngah kan chak vek a ṭul tawh a, zanin hi a bulṭanna chu a ni," tiin beisei an la neih thu a sawi.

Arsenal hian league match an khelh hmain FA Cup semifinal an khelh chhunzawm leh phawt dawn, tun hnai season thum chhunga nomawi vawi hnih an chawinaah hian final lut tur chuan Manchester City an paltlang a ngai dawn - Pathianni zanah City hi an mikhual ang.

Sanchez a nui

Season kal laia Arsenal tana goal khung hnem ber Sanchez-a'n tun hnaiah a goal khung a chawlhsan! Chile international hian league match hnuhnung pathumah goal a khung lo.

Middlesbrough lakah erawh Sanchez hian minute 42-naah Granit Xhaka hlawhchhuah aṭangin freekick mawi zetin a chhuih lut, a league goal 19-na niiin khualmual bikah goal 13 a khungna a ni chiah bawk. Sanchez hi an goal hnihna Ozil-a'n a khung theih nana tha thawhtu pawimawh a ni bawk.

Thierry Henry (12 goals) tih lohah chuan Sanchez hi Robin van Persie (5) nen Arsenal tan Premier League-a direct free kick aṭanga goal khung hnem an ni.

Arsenal player pawimawh Sanchez leh Ozil te hian season thar lo awm tur bak hi contract an nei tawh lo, an pawt sei dawn nge dawn lo chu nipui transfer laia chinfel tura dah a ni - Gunners hian chelh an duh a nih chuan Champions League khel phaka an awm a pawimawh hle ang.

Boro an tla dawn?

Kum 2017 bikah chuan Middlesbrough chiah hi EPL club 20 zinga league match bika hnehna la chang ve lo an ni! Boro hian tun season-ah match 32 an khelh tawh aṭangin point 24 an hmu a, table-ah a hniam ber dawt an ni.

Steve Agnew naute hian a him china awm Hull City chu point rukin an phak lo a, match ruk khelh tur an la neihah Manchester City, Chelsea leh Liverpool an la hmachhawn dawn avangin an kawng a thim hle. Inrinni zanah Bournemouth an lenchilh ang.

Middlesbrough manager lailawk Steve Agnew chuan, "Kan result-ah kan lawm lo, chutihrualin ka naute khan an theihna zawng zawng an hman avangin kha aia nasa chu beisei theih a ni tawh chuang lo. Arsenal kha na takin kan nawr a, kan chhaih buai hle bawk - goal hnihna kan khung thei lo kha a pawi a ni," tiin a sawi.