Dortmund hna a harsa dawn

Zanin dar 12:15-ah Borussia Dortmund chu AS Monaco khelmual Stade Louis II-ah an lenglut dawn. Ligue 1 club hian khualmualah 3-2 a hnehna an chan tawh avangin Dortmund tan Champions League semifinal lut tur chuan a tlem berah si hnih fai tal a chak a ngai, an hna a awlsam dawn lo.

French Ligue 1 hma­hruaitu Monaco hian rawl­thar duhawm an nei, kum 18-a upa Kylian Mbappe hian first leg-ah goal hnih a khung. Last 16 aṭanga Manchester City pet chhuaktu Mbappe hi a en tham leh khawp ang.

Christian Karembeu, Steffen Effenburg, Luis Garcia leh Leroy Sane te hnung zuiin Mbappe-a'n Champions League knockout stage-ah a game hmasa pathumah goal a khung vek. Europe club lian dang­te chil ti put mektu hian tun season-ah a club tan inelna hrang hrangah match 31 a khelh aṭangin goal 19 a khung tawh.

Monaco hian league match 32 khelh aṭanga point 77 hmuin hma an hruai mek, kum 2000 hnua a vawi khat nan league title lak an beisei sang tawh hle. French Cup semifinal an lut tawh bawk a, League Cup final-a an hneh loh Paris Saint-Germain an hma­chhawn dawn - nomawi lian pathum chawi an tumna kawnga an hna pawimawh hmasa chu Dortmund hneh hi a ni.

Thomas Tuchel-a nauten Bundesliga-ah beisei an phak lo, hma­hruaitu Bayern Munich bakah RB Leipzig leh Hoffenheim an phak lo. Dortmund tan ṭha taka season khar tur chuan Champions League-a hlawhtlin a pawimawh.

Dortmund hian kartawp league match-ah Eintracht Frankfurt 3-1 in an hneh, clup top scorer Pierre-Emerick Aubameyang-a'n goal a khung bakah Marco Reus a lo kir avangin inrintawkna nen France an pan dawn.

April 11 zan kha first leg an khelh hun a ni a, Dortmund bus chu bomb hmanga beih a nih avang­in darkar 24-in inkhel hun sawn tlai a ni. German club fans hian an khingpui tur Monaco fans chu an inah te lo thlengin an mikhual lakah ṭhat an chhuah a, fak an hlawh hle. Amaherawhchu beih an tawh avangin rilru khingbai tak chungin Monaco an hmachhawn - zan­inah erawh club huaisen zia an chhuah leh tawh beisei a ni.