MSL3 semifinal khel tur la chiang lo

Mizoram Super League Season 3-ah Zarkawt BCA-in semifinal an lut tawh a, club dang panga Mission Veng Vikings, Khatla TBL, Chanmari Hollows, Tuikual South BC leh Zarkawt Serpents ten semifinal beiseina an la nei vek. Vawi hnih champion tawh TBL chu tla thei dinhmunah an ding a, hei hian ngaihven a hlawh zual.

Vikings an phur

Mission Veng Vikings-in an match hmasa berah Zarkawt Serpents an hneh a, MBBA lamin rematch tura thutlukna an siam hnuah Vikings an talbuai. Champion tuma ṭan la Mission Vengin Ronald March leh Rikin Pethani te an chahluh tlai an tuar tel bawk a, match zawnin Chanmari Hollow leh Zarkawt BCA te an hneh lo.

Vikings hi tla tura ngaih ni hman mah se champion lai Khatla TBL chu 81 - 60 in an sawp a, MSL rematch hmasa berah Serpents an hneh. Amaherawhchu Vikings hian an elpui ber Hollow an hneh loh avangin April 20, Ningani zana Tuikual South an hneh loh chuan tla thei an ni.

Beisei pha lo TBL

Khatla TBL-in Garry Gill duhtawk loin MSL2-a champion puitu Vishesh Bhriguvanshi bakah American player Chris Solomon te an chah belh a, player ṭha pathum nen hian Vikings hmaah an mualpho. Hei vang hian TBL-in goal difference-ah Vikings an pha lo a, point inang hmuin league round khar se tehna hmasa ber tur head to head ah an pha lo bawk.

MSL hmasa pahniha champion Khatla TBL hian April 27 zanah Tuikual South an hmachhawn dawn a, hahchawlhna hun ṭha nei mah se Vishesh an chhawr theih a rinawm loh avangin semifinal an thleng lo a nih pawhin thil mak a ni lo ang.

Tuikual South lam hi

Tuikual South-in an match hmasa bera Mizo hlanga khel Chanmari BCA an hneh lo a, hemi hnu hian chiang takin Zarkawt Serpents leh Chanmari Hollow BBSP hneh leh mah se an la him chuang lo.

TKS vanduaina chu Mission Veng Vikings ṭhat lai berin an hmachhawn dawn a, tlak hlau Khatla TBL an la khelhpui dawn bawk. Phengphehlep hian an match hmabakah hnehna an chang lo ve ve a nih chuan relegation playoff khel thei dinhmunah an ding ang.

Semifinal-ah Hollow?

Chanmari Hollow hi vawi khat chauh an la chak nachungin an elpui ber Vikings an hneh avangin semifinal kawng a la inhawng zau hle.

MSL kaithar Hollow hian Serpents nen league round an khar dawn a, semifinal kawng a la inhawng a nih chuan an chetsual a rinawm loh. Chutihrualin an inkhelh leh hun a thlen meuh chuan tla thei an ni.

Serpents

Zarkawt Serpents-in hneh an la nei ve lo a, amaherawhchu an hmabaka Zarkawt BCA leh Chanmari Hollow te an hneh chuan semifinal luh theih dan kawng a la awm.

MSL3 khelh hmabak
April 20, Ningani
7:00PM Tuikual South BC Vs Mission Veng Vikings
April 21, Zirtawpni
7:00PM Zarkawt BCA Vs Zarkawt Serpents
April 27, Ningani
7:00PM Khatla TBL Vs Tuikual South BC
April 28, Zirtawpni
7:00PM Zarkawt Serpents Vs Chanmari Hollow BBSP