AFC Cup-ah Bagan inlan dawn
April 22-a Aizawl FC hmachhawn tur Mohun Bagan chu zanin dar 7:00 hian AFC Cup group stage match khel turin an inlan dawn a, Aisa-a club inelna sang ber dawttua Bagan inkhel chau tur hi Aizawl FC tan chuan thu hriat nuam tak a ni ngei ang.
Mohun Bagan mikhual tur Maziya Sports & Recreation Club (S&RC) hi Maldives club niin an ram league sang ber Dhivehi Premier League champion lai an ni a, AFC Cup-ah erawh an sulhnu a chhuanawm hran lo.
Maldives club hian kum 2013 hnuah AFC Cup an la khel ziah a, group stage erawh an la paltlang ngai lo. Season hmasaah pawh khan Bagan nen hian group khatah an lo awm ho tawh a, Kolkata club hian Guwahati khawpuiah 5-2 a hnehna changin Male khawpuiah erawh 1-1 in an inhnehtawkpui thung - chak chiang saa Bagan dah bik ngawt a harsa.
Mohun Bagan-in kartawpah Aizawl FC nen I League nomawi chawi tur zawnna ang hiala ngaih theih match an khel dawn a, Mizo club an hmachhawn tur hisap chunga Sanjoy Sen-a'n player a remkhawm thiam a ngaih dawn avangin a team a remkhawm dan tur hi hriat a chakawm tawh hle.
AFC Cup-ah Bagan player zingah Jeje Lalpekhlua a tlangnel fal a, Hnahthial tlangval hian goal thum a khung tling leh der tawh. Zaninah a inlan a nih chuan nikuma goal sarih khunga season khata Asia huap inelnaa Indian goal khung hnem ber record a lo siam tawh lehpel turin goal khung ngei a tum ang.