Mizoram Lockdown (inkharkhip) Ni 114

Manchester United legend Ryan Giggs-a'n a career chhung zawngin Red Devils tan bak a khel lo a, season 24 chhungin league match 672-a khelhsak a, goal 114-a khung. Giggs hian First Division League season hnih a khel hman hial! Kum 46 mi ni ve tawh Giggs hian 1990-91 season khan professional a nihna anga a season hmasa ber chu a hmang a, kum 2014-ah inkhelh a chawlhsan. Welsh midfielder-in mimal anga season a hman ṭhat ber chu 1993-94 season kha a ni a, inelna hrang hrangah match 58 khelin goal 17-a khung. United tan a career chhung zawngin inelna hrang hrangah match 963-a khel a, goal 168 a khung.

 

Premier League-ah ringawt vawi 13-a champion hman a, PFA Team of the Year-ah vawi ruk a lang. Red Devils tan hian FA Cup (4), League Cup (3), FA Community Shield (9), Champions League (2), UEFA Super Cup (1), Intercontinental Cup (1) leh FIFA Club World Cup (1) nomawi a chawi hman. Giggs hian Wales tan match 64 khelin goal 12-a khungsak hman a, inkhelh a chawlhsan hnuah coaching lamah a inhmang zui. Kum 2014 khan Manchester United coach lailawk atan ruat a ni a, 2014-16 chhung khan assistant coach dinhmun a luah. Kum 2018 khan an ram team Wales enkawl hna a thawk ṭan a, Euro 2020 khel turin hruai thleng mah se inelna hi Covid-19 avangin nakkuma neih tura sawn a ni.