East Bengal-in coach thar nei

I League-a champion tura beisei nei tawh lo East Bengal chuan Thawhṭanni zana an coach Trevor Morgan-a'n banna a thehluh hnu lawkah English manager thlak tur hming an puang ve nghal a, Santosh Trophy khelh zawh taka West Bengal champion puitu coach Mridul Banerjee an lalut.

East Bengal boss hlui leh hlawhtling taka Dempo SC lo kaihruai tawhtu Armando Colaco chu Kolkata club enkawl tur hian sawi rik ni mah se Red and Gold (East Bengal sawina) hian rin loh takin Mridul hi an lalut ta zawk a ni.

Mohun Bagan assistant coach hlui Mridul Banerjee hi Federation Cup khelh zawh thleng East Bengal enkawl tur hian ruat a ni a, club general secretary Kalyan Majumder chuan, "Mridul hi kan lungrual tlanna a nih avangin coach turin kan ruat a, Federation Cup thleng atan contract hi kan ziahpui phawt a ni," tiin a sawi.

Kum 56-a upa manager hian Kolkata khawpuiah tawnhriat a ngah tawh a, Kolkata club langsar zinga mi Mohammedan Sporting pawh a lo enkawl tawh. Bagan-a assistant dinhmun a luah hmain Guwahati club ṭha F.C. Green Valley a enkawl ṭhin.