Premier League khel tur Brighton & Hove Albion

Championship club pathum Premier League khel turin an tling ṭhin a, season thara khel tur pakhat chu a chiang ta - Thawhṭanni zan khan Brighton & Hove Albion chuan Wigan Athletic chu 2-1 in an hneh a, inkhel lehlamah Huddersfield leh Derby County an inhnehtawk bawk avangin season thara Premier League khel turin an tling chiang tawh.

Brighton tan kum 34 hnua top flight football an khelh lehna hmasa ber tur a ni a, division sang bera an inlan hnuhnung ber chu 1982-83 kha a ni tawh. Chris Hughton-a enkawl club hian an hmabak match thumah point thum chauh pawh an hlawh chhuak leh a nih chuan an champion chiang bawk ang.

Seagulls (Brighton sawina) tan Glenn Murray leh Solly March ten goal an khung hnuah Wigan tan Nick Powell chuan goal khat khung ve mah se hun tawp nan minute nga chauh a awm tawh avangin an si phurh an sut zo thei lo a, Championship club 24 zinga 23-na ni mek club hian season tharah chuan League One an khelh hmel ta hle.

Rafael Benitez-a enkawl Newcastle United erawh Ipswich Town lakah 3-1 in an tlawm a, pahnihna dinhmun luah mekin an hnuai chiaha awm Reading aia an sanna chu point ruk a ni - season tharah pakhatna leh pahnihinain Premier League an khel chiang dawn a, pathumna aṭanga paruknain playoff hmangin hmunruak pakhat la awm an inchuh leh ang.

Mangṭha Championship

Brighton hian season hmasa khan Premier League khelh theihna remchang an lo nei tawh a, mah se match hnuhnung berah Middlesbrough nen an inhnehtawk avangin pathumnaah goal difference hmangin an tla a, playoff semifinal-ah Sheffield Wednesday an hneh loh zui bawk avangin an Premier League beiseina a tawp.

Mahse, Chris Hughton-a en­kawl club hian Premier League khelh an phu tih pho­langin tun season-ah hmuhnawm takin an khel a, league match 43-ah vawi 28 hnehna changin point 92 an nei tawh a, season hmasaa an point hmuh zat 89 an khum der tawh.

Premier League zinkawng

Brighton-in season thara Premier League khel tura an invawrh kaina kawngah an tlarhma player-te an thawh­hlawk takzet a, Glenn Murray (22), Anthony Knockaert (15), Sam Baldock (11) leh Tomer Hemed (11) te chuan an goal 73 khung zinga 59 zet chu an khung a ni. Tlarhnung lam sawihmaih a thiang lo a, Championship-a goal chhuah tlem ber niin vawi 36 an chhuah a, match 21 zet goal an chhuah lo.

Seagulls hian Cham­pion­ship-ah mahni home-a point hmu hnem ber dinhmun luahin point 54 zet an hlawh chhuak a, an khelmuala match 22 an khelhah vawi 17 zet hnehna an chang thei. Hei mai hi a ni lo, October - December chhung khan vawikhatmah tlawm hmel an hmu lo a, match 15 an khelhah vawi 11 hnehna an chang.

A rei lua e

Kum 20 liam ta kha chuan Brighton hi Football League aṭanga petchhuah theih dinhmunah an ding a, 1996-97 season khan Hereford nen inhmachhawnin him turin draw an mamawh. Minute 61 a nih thleng chuan Brighton hi 1-0 in an hniam a, substitute Robbie Reinelt-a'n minute 62-naah an si phurh sutin an inhamtang hram.

A hunlaia an coach, Brigh­ton chhanhim tura lakluh Steve Gritt chuan, "Hetiang ang thil hi chu engtikah mah tawn leh ka duh tawh lo," tiin a sawi a, a sawi ang ngeiin Brighton in he dinhmun hlauhawm ang hi an tawng leh tawh lo. Mahse, Brighton hi an hlawhtling nghal tawp lo. An khelmual Gold­stone Ground chu an ba rulh nan an hralh a ngai a, sorkar ta Withdean Stadium-ah an khelh a ngaih phah.

Bloom hnuaiah an vul

Kum 2009 khan pawisa khelhna lama hming chher leh sumdawng hausa Tony Bloom chuan Brighton-ah neitu nihna 75% leiin chairman dinhmun a luah a, club khelmual thar sak nan ringawt pound maktaduai 93 bawr vel a inseng nghal.

Bloom hian Brighton a lei hnu lawkah Uruguay inter­national hlui Gus Poyet chu manager turin a lalut nghal a, League Two-ah champion-in an hawikir tawh lo. Tuna zawhna awm erawh Brighton hi Premier League-ah an dingchang ang em? tih hi a ni. Championship aṭanga Premier League-a invawrhkai 44% chu an tla lehnghal a, 2001-02 leh 2011-12 season khan Premier League kaithar pathum chu an tla lo vek a, 1997-98 season-ah an tla vek thung.

Seagulls player zingah loan-a an lakluh tiam lohin Murray, Knockaert, David Stockdale, Steve Sidwell, Shane Duffy leh Liam Rosenior te chu Premier League-a inlan tawh awmchhun an ni a, manager Hughton erawhin Newcastle leh Norwich a lo kaihruai tawh thung - Brighton tana tun din­hmuna hriat nuam ber tur chu Premier League an khelh dawn vang hian pound maktaduai 170 bawr velin an hausak belh ang.