Cavs leh Spurs chak nawn

NBA champion Cleve­land Cavaliers chuan playoff match hmasa pahnihah hnehna an chang ta. Nimin zing Game 2 inkhelah Cavs hian In­diana Pacers 117-111 in an hneh a, inkhel pakhat zawkah San Antonio Spurs chuan Memphis Grizzlies 96-82 in an hneh ve bawk - Cleveland leh Spurs hian series-ah 2-0 ve ve in hma an hruai.

Quicken Loans Arena-a inkhelah Cleve­land tan Kyrie Irving chuan point 37 a score a, nikum NBA Finals Most Valuable Player LeBron James chuan point 25 score-in Kevin Love-a'n point 27 a nei ve bawk. Zirtawpni zing dar 4:30-ah Game 3 an khel leh ang.

Cavaliers coach Tyronn Lue chuan, "Kan inkhel kha chik takin ka ennawn a, turnovers vawi 19 kan neih aṭangin kan khingpuite khan point 24 an hmu, hmasawnna tur kan nei tih a chiang," tiin a sawi.

Inkhel dangah Spurs tan Kawhi Leonard chuan point 37 score-in a team a chakpui. American star Leonard-a'n NBA playoffs a khelh tawh chinah match khata point a neih hnem ber ṭum a ni.

Spurs coach Gregg Popovich chuan, "Ka nauten fak an phu hle, a bik takin basket kan ven­him ṭhat dan khan min ti lawm. Semifinal lut tur chuan point score hnem ringawt a tawk lo a, keimahni lam kan inven ṭhat a pawimawh," a ti.

Zirtawpni zing dar 7:00-ah Spurs hi Game 3 khel turin FedExForum-ah an lenglut ang - NBA Playoffs hi best of seven series a khelh a ni.