French Open beiseitu Kvitova

Petra Kvitova chuan thla leha khelh tur French Open-ah inlan theih a beisei thu a sawi chhuak. Kvitova hi a hliam vangin kuminah a la inkhel lo a ni.

Nikum December thla khan Czech star hi a chenna inah misualin chemte hmangin a bei a, a banah hliam a tuar. A ban hi zai niin a rei lo berah thla ruk tal a chawlh a ngaih tur thu amah enkawltu doctor ten an sawi.

Mahse, beisei aiin Kvito­va hi a dam chak a, Thawh­ṭanni khan kumina Grand Slam pahnihna French Open khel turin a hming a ziak lut. November thla hnua court chhunga la inlan leh lo Kvitova-i'n Roland Garros-a hming chher a tumna hi tunah chuan thu mai a la ni rih.

Wimbledon vawi hnih champion tawh Kvitova chuan, "Paris-ah hian ka la inkhel thei lo zel a nih chuan chanchin ngaihthlak nuam lo tak a ni ang, tuna pawimawh ber chu a rang thei ang bera tennis ka khelh leh theihna tura rilru huaisen leh hmathlir ṭha ka neih hi a ni," a ti. French Open hi May 28 aṭanga khelh ṭan a ni ang.