Delhi khawpuiah KKR an vul

Kolkata Knight Riders chuan Delhi khawpuiah mikhual tlangnel zia an chhuah a, Delhi Daredevils chu IPL inkhelah wicket liin an hneh.

Feroz Shah Kotla-a inkhelah Delhi an bat hmasa zawk a, over 20-ah run 168 siamin wicket sarih an hloh. Delhi tan Sanju Samson (39 runs) leh Rishabh Pant (38 runs) tih loh chu run 30 siam tling an awm lo a, wicket thum latu Australian bowler Nathan Coulter-Nile chu DD batsman tan ral a ni.

Kolkata Knight Riders bat hun a thlang a, Manish Pandey chuan run 69 siama a tawp thleng damin a team hi hnehna a chanpui. KKR hian an target hi over 19.5-ah an umpha a, wicket ruk chiah an hloh.

Thawhṭanni zan IPL inkhel dangah Sunrisers Hyderabad chuan run ngain Kings XI Punjab an hneh bawk. Sunrisers an bat hmasa zawk a, over 20-ah run 159 siamin mi paruk an hloh. Opener leh captain ni bawk David Warner chuan run 70 siamin a tawp thleng mah se a ṭhianten an thlawp ṭhat tawk loh avangin beisei ang zat run an siam thei lo.

Punjab bat hun a thleng a, run 90 siamtu Manan Vohra a che ṭha hle - a ṭhiante zingah erawh run 15 siam tling an awm loh avangin mimal chet ṭhatin nghawng a nei thu lo a, Kings XI hian over 19.4-ah run 154 tlin hramin an tlawm.

Zanin dar 8:00-ah inkhel pakhat a awm dawn a, Sunrisers Hyderbad leh Delhi Daredevils an inhmachhawn lehnghal ang.