League One khel tur Portsmouth
Premier League club hlun ni ṭhin Portsmouth chuan League Two-ah season li zet hun an hman hnuin League One-ah season thar aṭang chuan an inlan ve leh dawn ta. Thawhlehni zan khan Notts County chu khualmualah 3-1 a an hneh avangin pathumna an nichiang tawh a, pathumna chin hi division chung lamah an chho ṭhin a ni.
Pompey (Portsmouth sawina) hi 2010-13 inkar khan vawi thum ngawt an relegate avangin Premier League aṭangin league mawng berah an tla thla hman a ni. Kum 2008 khan Portsmouth hi Harry Redknapp chuan FA Cup-ah nomawi a chawipui a, Premier League-ah pariatna niin player langsar David James, Sol Campbell, Glen Johnson, Lassana Diarra, Sulley Muntari, Niko Kranjcar leh Kanu te a hunlai hian an kawl.
Mahse, kum 2010 khan an leiba ngah vangin Premier League club zinga hrem hmasak ber ni turin point kua paih sak an ni a, Paul Hart hnuah Avram Grant-a'n chhanhim tum mah se an relegate. Kum 2012 khan an leiba ngah vang bawkin point 10 paih sak niin League One lamah an tla thla a, April 2013 khan League Two-a an tlak thlak hma chiahin The Pompey Supporters Trust chuan an club hi an lei ta nge nge.
League Two-ah season hnih chhung 13-na leh 16-na an nih hnuin Paul Cook an lalut a, a season hmasa berah playoff semifinal khelhpui nghalin tun season-ah erawh division sang zawk a inhlankaipui ta.