Wimbledon a pawimawh zual - Djokovic

Novak Djokovic chuan a tan Wimbledon a pawimawh zual thu a sawi. Australian Open a khel thei lo a, French Open-ah beisei a phak lo, US Open a khel thei dawn em, tih a la chiang lo - a tan chuan grass court inelna lian hi a pawimawh zual hle.

World number 2 Djokovic chuan, "Tuna United States inkaihhruaina angah chuan an ramah ka zin lut thei dawn lo, tournament ka khel thei dawn nge dawn lo pawh hriat a la ni lo. Chuvangin Wimbledon hi ṭha taka ka khelh ngei a ngai," a ti.

Hripui leng laka invenna (vaccine) a la duh lo a, hei vang hian Australia khawpui Melbourne aṭangin an thawn haw tawh. US-ah pawh tun dinhmunah chuan, vaccine la lo tan zin luh theih a ni lo - invenna hi lak a la tum rih lem lo.

Serbian star chuan sawi zawmin, "Tun hma pawhin ka sawi tawh, kum sarih mi vel ka nih lai aṭang khan Wimbledon champion nih ka châk tawh a, chu bakah world number 1 nih ka châk ṭhin bawk.

"Heng ka duhthsam pahnih hi a thleng dik tawh a, thlen nawntir leh theih ka châk hle. Ka hriat theih chinah chuan Pete Sampras-a'n Wimbledon title a la lai kha TV aṭanga tennis ka en hmasak ber a ni," tiin Wimbledon a ngaihhlut thu a sawi.

Tun kar aṭangin All England Club-ah Wimbledon an khel ṭan dawn, seeded pakhatna Djokovic hian a match hmasa ber atan zanin dar 6:00 hian Kwon Soon-woo a hmachawn ang; Centre Court-a inkhel hmasa te hun hman dan a zirin an ṭan hun hi a tlai hret thei bawk.

Kumin Wimbledon-ah hian indo buaina avangin Russian leh Belarus player an inlan thei lo, hei vang hian world ranking chhiar a ni dawn lo. Champion lai Djokovic hi champion nawn pawh ni se, number 1 Daniil Medvedev chu ranking-ah a umphak thei dawn rih lo a ni.

Grand Slam vawi 22 champion tawh Rafael Nadal pawh a inlan dawn. Wimbledon vawi hnih champion tawh Nadal erawh Thawhlehniah a inlan chauh ang. Spanish star hian a ke hliam a dam tawh thu a sawi a, harsatna nei loa a khel thei a nih chuan champion tura rinkai a ni ang.

Kum 36 mi Nadal chuan, "Ni khat mai ni loin a aia rei pawh na hre loin ka kal thei ta, ka tan chuan chanchin lawmawm tak a ni. Zingah na hre loin ka tho thei tawh, hetiang thil hi kum khat chuang hnuah a thleng ve leh chauh," a ti.

A ke phah hliam vangin Nadal hi season hmasa khan a inkhel thei lo rei hle, a hliam a dam mai theih loh avangin tennis chawlhsan pawh a rilruk hman hial. Mahse, tunah erawh a hliam hi a dam pangngai thei dawn ta niin a lang.