Hotshots lakah TKS vanduai

A tawpa an inthlauhna chu point 21 lai a ni a, inkheltir lam thlir erawh chuan Tuikual South an vanduai tia sawi theih a ni. Inrinni zan Mizoram Super League inkhelah Phengphehlep hian Mission Veng Hotshots chu 102-81 in an hneh lo.

R. Dengṭhuama Indoor Stadium, Mualpuia inkhelah TKS lamin bul an ṭan fuh a, quarter hmasa berah point 31 lai an nei thei. Chawlhlawk an hman lai pawhin hma an hruai a, mahse second half-ah an player ṭha Darrell Bowie a talbuai.

American player hian an khingpui lam ni lo, ama teammate zingah buaina a chawk chhuak a, thlak niin a inkhel zui tawh lo. Team boruak a fuh lo chho, senior player F. Zodinthara hoin theihtawp chhuah mah se an ṭang zo ta lo a ni.

Inkhel dangah Zarkawt BCA chuan team ṭha bik an nihna an lantir. Champion lai hian Chawnpui lakah point 126 ngawt an nei a, tun season bikah match khata point luh hnem ber ṭum a ni hial; 'play in' khel turin an dinhmun an siam fel nghal bawk.

Zirtawpni zan khan Chanmari Vikings chuan Chawnpui an hneh a, a sang pali zinga tel phak turin beiseina an la nei zel. Vikings hian match khata khel tlem chungin Tuikual chu point khatin an phak lo - TKS nen hian palina dinhmun an inchuh chho ang.