MVA an inthlang thar

Mizoram Volleyball Association (MVA) chuan 2022-2025 chhunga an hruaitu tur an thlang thar. Volleyball Federation of India vice president ni lai Dr. Lalmalsawma Nghaka chu MVA president atan an thlang.

Zirtawpni khan BS Farm, Falkland, Aizawlah MVA office bearer tur mi pariat thlanchhuah an ni a, president atan hian senior vice president ni lai Dr. Mala a tling; MVA president nihna hi a vawi thum chelhna tur a ni.

Dr. Mala chuan, "Chona thar kan hmachhawn turah Mizoram aṭangin India aiawha khel phak international player an chhuah ngei theih nan hma kan la dawn a; khairual taka hmasawnna a thlen theih nan India team squad-ah Mizo coach an awm leh theihna tur bakah, Mizo international referee hmasa ber an chhuah theih nan theihtawp chhuah ngei ka duh a ni," a ti.

General Secretary ni lai, Volleyball Federation of India Development Committee member C. Lalrokhuma (Puitea) chu a nihna ngaiah an thlang nawn bawk.