Armed Veng South, Republic Veng leh Bethlehem Vengthlang inlan hun

LBS Suzuki All Mizoram Inter Village Football Tournament 2022-ah vawiin hian team ṭha zinga chhiar tel Armed Veng South, Republic Veng leh Bethlehem Vengthlang te an inlan dawn. Vawiin hian ground pangaah inkhel 19 a awm dawn a, team 19 an tla dawn tihna a ni.

Tun ṭum Inter Village-ah hian seeded siam a ni lo a, chutihrualin first round-ah hian Aizawl khaw chhung team leh thingtlang team an inkhel thei lo. Inelna ni hnih neih tawhah Local Coucil team aiin Village Council team an chungnung hret a, vawi 16 inkhelh tawhah thingtlang team vawi kua an chak.

Team ṭha chu
Armed Veng South hi tun hma aṭangin player ṭha tamna an ni a, an ṭhenawm Armed Vengin CYMA Football-ah ringawt pawh nomawi vawi nga an chawi tawh laiin an la champion ve lo. Tun ṭumah hian Indian Super League player Laldinliana Renthlei (Jamshedpur) leh Lalhmangaihsanga (FC Goa) te awmna an ni a, nomawi chawi an tum ruh hle. Chawhma dar 10:00 hian AVS hian RG Stadium-ah Mimbung an hmachhawn dawn a, fiahna tia chhal tham a la tling lo.

Republic Vengin Mizo striker ṭha F. Lalrinpuia (Valpuia) an la kawl a, chawhma dar 9:00 hian Lengpuiah Bukpui an hmachhawn dawn. Kolasib District-a awm Bukpuiah hian mi sangkhat chuang awrh an awm a, Republic Venga chhungkaw awmzat nen a intluk tawk. Team pahnih hi khaikhin a rem lo.

Bethlehem Vengthlang hi tun inelnaa champion rinkai ni pha an ni a, ISL-a khel K. Lalṭhathanga leh Laldinpuia bakah tualchhung player ṭha Lalrammawia, Lalramzauva leh Lalmalsawma te an ni nuk. Vawiin chawhnu dar 1:00 hian BVT-in Phullen an hmachhawn ang.

Engtin zel?
Champhaia Inter Village Football-a semifinal thleng thei Hnahlanin vawiin chawhma dar 8:30 hian Lammualah Dengsur an hmachhawn dawn. Hnahlan khelh dan aṭangin Champhai aṭanga inelna hmachhawn tur dang Zotlang, Melbuk leh Zokhawthar te theihna a teh theih ang.

Tun ṭum inelnaah hian Joint VC-a tel theih a ni a; Joint VC-a tel Lawngtlai leh Hnahthial te chiang takin an chak. Vairengte erawh chak zo lo mah se team ṭha Ramhlun South nen an inhnehtawk hle.

Vawiin hian Mamit Jt VC an inlan dawn a, MZU Ground-ah vawiin chawhnu dar 1:00 hian Chhingchhip VC an hmachhawn ang.