Wayne Rooney-a'n Derby County a chhuahsan

Manchester United legend Wayne Rooney chuan Derby County a chhuahsan a, kum khat contract la nei mah se English striker ropui ṭhin hian Derby enkawl chhunzawm tumna a nei tawh lo.

Derby hi suma an tlakchhiat avangin September, 2021 aṭang khan administration-ah dah an ni a, League One-ah an relegate bawk - an harsat lai ber pawhin Rooney a cham zel a, a tawpah erawh a chhuak ve ta.

Rooney chuan, "He club hian ngaihtuahna thar leh rilru thar nena enkawl theitu, thla 18 liam taa thil thlengin a tihbuai ve loh enkawltu a mamawh a ni," a ti a, Derby a cham chhungin match 85-ah vawi 24 hnehna a chanpui a, vawi 22 draw result neiin, vawi 39 an tlawm.

Derby hi an khawtual sumdawng hausa David Clowes chuan lei tumin a dawr tawh a, a company Clowes Developments (UK) Ltd chuan club khelmual Pride Park stadium chu lei tawhin, season thar an ṭan theih nan loan a pe tawh bawk.

Ruahman ang chuan Derby hi July 30-ah League One-a an match hmasa ber khel tur an ni a, Oxford United nen an inkhel dawn - mahse, he club talbuai tak hian an club-a contract nei mek player panga chiah an nei!

Rooney-a chhuah tak avangin a assistant Liam Rosenior chuan vawiin hian pre-season training a kaihruai dawn a, mahse, kaihhruai tur hi player panga bak a nei dawn lo.

Derby hi Quantuma chuan an enkawl mek a, Rooney chhuah thu hi tichiangin,"Chhuah a duh ta mai hi pawi kan ti takzet a, theihtawp chhuahin cham turin thlem mah ila, chhuah a duh hi kan hrethiam a ni," an ti.

Clowes Developments (UK) Ltd leh Derby indawrna hi a kaltluang thei a nih chuan, season ṭan hma chuan Derby buaina hi chinfel hman a nih a rinawm.