Bale-a'n Los Angeles a zawm dawn

Wales captain Gareth Bale chuan Cardiff City nena sawizawm an nih hnuah USA lam a hawi a, Major League Soccer club Los Angeles FC chu free transfer-in a zawm dawn - June 2023 thleng a khel dawn niin an sawi.

Kum 32 mi Bale hian Real Madrid-ah kum kua zet hun a hman hnuin Santiago Bernabeu a chhuahsan a, Cardiff bakah a club hlui Tottenham Hotspur hming pawh lam rik a ni.

Mahse, Bale hian US lam a pan dawn a, he thu buatsaih lai hian Los Angeles lam hian thuchhuah la siam lo mah se Bale zawk hian twitter lamah, "Los Angeles, kan inhmu thuai dawn nia," tiin a ziak tawh.

Bale hian Wales-in World Cup an khelh phak loh chuan inkhelh a chawlhsan dawn niin sawi a awm a, mahse, World Cup playoff final-ah Ukraine hnehin Qatar pan turin an inpettling.

Hetiang boruak karah hian khawvela footballer man to ber lo ni tawh hian Football Association of Wales nena training ground inṭawm, a pian leh seilenna khaw club ni bawk Cardiff a zawm dawn niin an sawi.

Kar hmasa lawk pawh khan Bale-a aiawhte chuan Cardiff nen inbiakna an neih mek thu an sawi a, mahse, a tawpah chuan sum tamna US lam a pan dawn ta zawk a ni.

LAFC hi USA international hlui Steve Cherundolo chuan a enkawl mek a, tun hnai lawkah Juventus legend Giorgio Chiellini lalutin, Arsenal striker hlui Carlos Vela an nei sa bawk.

MLS season hi February - October chhung khelh ṭhin a ni a, July 7 aṭangin season laihawl transfer hi hawn a ni dawn a, hemi hnuah hian Bale hian LAFC hi a zawm thei ang.

LAFC hian MLS Western Conference-ah hma an hruai mek a, hmahruaitu ni chunga season an khar theih chuan MLS playoff semifinal an tling nghal dawn - semifinal zawhah hian Conference finals khelh a ni leh ang a, heta chak team pahnih chuan November 5-ah MLS Cup final khelin champion an inchuh dawn a ni.

November 21-ah World Cup khelh ṭan a ni dawn a, MLS season zawh hun leh World Cup thlir chungin Bale hian US lam pan hi a thlang ta niin a lang.

Bale hian kum 2013 khan a hunlaia footballer man to ber ni turin Real chu £85mtd-in a pan a, Spanish club tan match 258-ah goal 106 khungin assist vawi 67 a nei a, La Liga (3), Copa del Rey (1), Supercopa de España (1), Champions League (5), UEFA Super Cup (3) leh FIFA Club World Cup (3) ah a champion pui a, a man a khel chhuak chiang hle.