Kalvin Phillips manah City leh Leeds an inrem

Manchester City chuan Leeds United midfielder Kalvin Phillips la turin Leeds chu inremna an neihpui a, England international manah hian pound maktaduai 45 an inseng dawn.

Premier League champion hian Phillips manah hian pound maktaduai 42 an pe phawt ang a, £3mtd chu a khelh ṭhat dan a zira City-in an insen belh leh tur a ni ang.

England tana vawi 23 inlan tawh, kum 26 mi Kalvin Phillips hian he thu buatsaih lai hian contract a la ziak fel lo a, he thuziak i chhiar meuh chuan Leeds jersey nen tlangzarh a ni tawhin a rinawm.

City hi club legend Fernandinho chuan a chhuahsan a, kum kua zet Etihad Stadium-a lo khel tawh defensive midfielder chhuah avang hian City chuan Phillips hi nipui transfer-a lakluh tumin an hel reng a ni.

Chutihrual chuan City boss Pep Guardiola-a'n a system-ah defensive midfielder pakhat bak a hmang ngai lo a, Spanish midfielder ṭha mi Rodri a neihsa avangin Kalvin Phillips hi thachhang dawltu chauh a nih a rinawm.

Kuminah World Cup khelh a ni dawn a, Marcelo Bielsa hnuaia Leeds-a hming chhertu Phillips hian England tana inlan turin Jude Bellingham, Jordan Henderson, Conor Gallagher leh James Ward-Prowse te ho a inelpui dawn a, City tan a inlan tam loh chuan a pawi thei ang.

Leeds aṭanga inzir chhuak Phillips hian Leeds lo club dang a la nei ngai lo. Season hman zawh takah khan Leeds tan match 23 khelin goal khat leh assist vawi khat a nei a, kum 2015 khan Leeds tana a match hmasa ber khelin, match 233-ah goal 13 khungin assist 14 a nei a, 2020-21 season khan England men's player of the year-ah thlan a ni.

City-in Kalvin Phillips an lakluh lai hian Leeds chuan City academy aṭangin midfielder Darko Gyabi an lalut ve thung a, kum 18 mi midfielder lakluh nan hian pound maktaduai nga an inseng.

Premier League champion City hian nipui transfer-ah pound maktaduai 51.2-in Erling Haaland an lalut tawh bawk a, Norwegian striker goal khung thei bik hian kum nga chhung atana contract ziakin, a contract ang hian a khel a nih chuan kum 2027 thleng Etihad Stadium-ah a cham ang.

Borussia Dortmund aṭanga lakluh striker hian July 1-ah City hi a zawm dawn a, hetihlai hian forward Gabriel Jesus chuan Arsenal a pan ngei a rinawm bawk.