World Cup squad-ah player 26 tel thei

Football khawvela thuneitu sang ber FIFA chuan, World Cup-a team pakhatin player an neih theih zat a tipung a, tun hmaa player 23 ni ṭhin chu player pathuma tipungin, squad khatah player 26 a tel theih tawh dawn.

Hei chauh hi a ni lo - substitute bench-ah player 15 an ṭhu thei dawn a, chumi awmzia chu player koh zawng zawngin match an neih apiangin mipui ṭhutnaa ṭhu bik loin an team an ṭawiawm thei dawn tihna a ni.

Hetihrual hian team official bench-ah mi 26 aia tam an awm a rem dawn lo - substitute player 15 bakah team official 11 an awm thei dawn a, an zinga pakhat tal chu team doctor an nih a ngai bawk. Player 26 hi thlan ngei ngei tur tihna a ni lo a, mahse, a tlem berah player 23 tal an thlan erawh a ngai.

World Cup squad hi October 20 hmaa thehluh vek tur a ni dawn a, match hmasa ber hi November 21-ah khelh a ni dawn a, tlai dar 3:30-ah Senegal leh Netherlands an inkhel ang.

Ṭum dang ang lo takin kumin World Cup hi a thlengtu tur Qatar lum luat avangin thlasikah khelh a ni dawn a, December 18-ah final khelh a ni ang.

FIFA chuan World Cup khel tura koh player-te chu November 13 hnu lama club tana match khelh an phal tawh lo - European league ho pawhin World Cup nena inmil turin an league kalpui dan an siksawi ve bawk.

Khawvela league ngaihven hlawh bera chhal ngam Premier League pawhin ṭum dang aiin season an ṭan hma dawn a, August 5, Zirtawpni zan dar 12:30-ah Crystal Palace leh Arsenal ten league match hmasa ber an khel ang.

November 12 zanah World Cup hmaa Premier League match hnuhnung ber khelh a ni ang a, club 20-te an inlan vek ang. Krismas ruai ṭheh ni, December 26-ah league hi khelh chhunzawm leh tur a ni dawn.

English football-a thuneitu sang ber Football Association chuan World Cup-a England-in an neih ṭhat ber an thawhchhuahpui theih nan, November 12-a Big Six club-te inhmachhawn tir lo turin a ngen hial.

Premier League chuan FA ngenna ngai pawimawhin Arsenal, Chelsea, Liverpool, Manchester City, Manchester United leh Tottenham Hotspur te zingah November 12-a inhmachhawn tur an awm lo.