Inter Village Football-ah goal a sur

LBS Suzuki All Mizoram Inter Village Football Tournament-ah a ruh no no an chhuak zel a, intum tawk deuh aṭanga intum tawk lo deuh thlengin an awm. Inrinni khan MFA Ground (Sairang Dinthar) leh Lengpuiah chauh inkhel a awm a, match riat lekah goal 63 tehmeuh a lut.

Hnahthial Jt VC-in rinlawk ang ngeiin team ṭha an ni tih an pholang a, Bungkawn Vengthar chu 11-0 in an sawp. Khawzawl Vengthar chu Muthi tan an la 'u' hret a, 9-2 ngawtin hnehna an chang. Inkhel pahnihah ringawt pawh hian goal 22 a lut.

Inkhel hmuhnawm bikah Ramhlun South leh Joint VC Vairengte chu chhiar tel ngei a ṭul a, Sairang Dinthar inkhel hmuhnawmah hian goal 14 a lut. Vairengte hian Khelo India-a Mizoram champion puitu Augustine Lalrochana leh

K. Zomuanawma te hmangin 2-0 in hma hruai hmasa mah se Ramhlun South-in Malsawmfela te unau an kawl.

Sawmfela hian goal hmahruai a khung hnuah a nau Vanlalthlamuana'n goal li khungin Lalnunmawia'n goal hnih a khung bawk. Ramhlun South tana Sawmfela te unaunin goal sarih an khung zarah Vairengte 9-5 in an hneh.

Sairang Dinthar inkhel hnuhnung berah Hortokiin Mission Vengthlang an barakhaih teuh hle. Hortokiin Zonunsanga hmangin first half-ah hma an hruai a, mahse game mawi zawk Mission VT-in Joseph Lalkhawngaiha hmangin minute 84-naah siphurh an sut a, injury time-ah Jonathan Lalfakawma'n chakna goal a khung.