ATK-Mohun Bagan tan green & maroon

India rama league sang ber Indian Super League-a inlan tur ATK-Mohun Bagan chuan season thar lo awm tur atana an jersey rawng tur an puang a, Mohun Bagan-in rei tak an lo hak tawh ṭhin green & maroon bawk an ha ang. 

January 16 khan ATK neitu RP-Sanjiv Goenka Group chuan Bagan-ah hian 80% share an lei a, Kolkata club hi ATK nena inzawmin season thar lo awm tura ISL khel turin an inruahman. Rei tak chhung chu club hming tur leh jersey rawng tur thlengin zawhna a awm. ATK-in a sen leh var inpawlh chu an home jersey atan an hmang ṭhin a, logo hran an nei thlap bawk. 

ATK lam hian 80% lai share an neih bawk avangin ISL-a ATK thuam awmsa leh logo chu ATK-Mohun Bagan hian an rin zui mai rin a ni - mahse, ATK neituten zau takin an thlir a, fans ngah zawk Bagan lawmna turin thutlukna an siam. 

Bagan jersey, a sen duk leh a hring inpawlh an hak dawn bakah hian logo pawh Bagan tho rin tur a ni a, 'ATK' tih chu ziah belh a ni thung ang. ATK Mohun Bagan neitu Dr. Sanjiv Goenka chuan, "Naupan lai aṭangin he club hian ka thinlung a luah tawh a, an match ropui ber ber an khelh lai pawh kha ka en hman. Hun rei tak chhung zah leh chhuang taka an lo kalpui tawh jersey chu chhawm nun zel kan duh a ni," a ti a, a club chu world class team-a siam a tum thu a sawi bawk.